再戰書展2011

朋友有兩張贈卷，恐龍媽決定再入場睇自己鍾意嘅嘢！
因為爸爸要陪恐龍仔學琴，媽媽先行出門。

去到灣仔，一心去行兒童天地入口，點知警察叔叔話無咗喎！左邊只可以出，唔可以入！
咁唯有又上返橋面行運啦...
上到去，見到有個小朋友+老人通道，仲嬲緊嘅恐龍媽同護衛叔叔講：我想去銀行呀~
就咁，攞完錢，入場！最嬲嘅係~~~ 警察叔叔講大話！個售票處仲响度，我仲見到有人行緊入去！！！

乜警察都可以講大話架咩？！

入到場內，隨便走走，買咗兩本書俾牛牛 (都知佢唔鍾意睇書架喇！)，仲有去思展買<基礎漢字500> ，之後，恐龍仔帶住飯盒入場，我地開完飯就入咗Hall 1行大運喇！

第一站，page one！恐龍仔第一次見到老鼠記者 Geronimo Stilton, 好似好鍾意咁，要媽媽買俾佢！

我自己就買咗兩本英文小說.. 都係睇開嘅作者，65折，好抵！

再行~都無乜特別，差唔多9點，要返屋企喇！

出到去，見到架紅van, $20去旺角，停隧道口... 3個人即係$60, 好貴，坐的士都得！不過算啦...大家都好攰喇！
出咗火車站，我地仲坐小巴返屋企... 都係第一次咋！懶到行10分鐘都慳返！