cutie face

牛牛出咗大牙成兩個星期，終於俾媽媽影到喇！ 一隻食草嘅牛，係無犬齒架！所以... 跳咗~直接出小臼齒囉！ (講到好有道理咁~ 哈哈~)

呢日，媽媽見到咁好日光，就攞咗相機出嚟同啱啱瞓醒嘅牛牛影相..
呢個叫cutie face, 係返日嘅傑作！平應係雙手架，不過呢刻有一隻手忙於捉兔仔！

媽媽最怕嘅，就係爬梳化！仲要行嚟行去.... 好驚！

休息吓先..

呢隻嘢，每次俟埋梳化就傻笑，有時仲會一邊跳舞，好似R嚟背 脊咁！

仲有，就係成日搶嘢！俾佢搶到手就傻笑，你想攞返都幾難呀！

聽指令

15個幾月嘅牛牛，最近聽指令叻咗！
除咗"俾" or "give" 都明白之外，仲會有時特登唔俾你！笑吓笑吓.. 巴閉喇！
不過~ 有時都肯嘅..

另外，仲識得cutie face喇！只係~ 手指係指住耳仔！唔係指住面珠仔！
超可愛！

可惜屋內燈光唔夠..  影得好蒙！

同場加演..食兔仔！ (牛呀牛.. 你個口腔期幾時過呀？！)

變面

呢隻牛牛~ 最近好鍾意學大人，呢日，佢扮緊"花"，兩隻手包住下巴~

好可愛！
可惜影唔到靚靚可愛樣！

轉個頭，仲表演變面！

七情上面架！

點解咁？ 只不過係媽媽唔俾部相機佢玩囉！

搬咗嚟呢間屋住咗十日，告別以前班粉絲，呢隻牛已經又有粉絲喇！就係樓下禮賓部嘅姐姐們！當日~ 佢就係學人飛吻，可能唔覺意有d錫錫飛咗去姐姐度...
中咗招！

新居~ 設計效果圖

呢晚，約咗恐龍爸一齊去睇圖。

呢間係恐龍仔間房，設計概念係想俾d 馬騮仔爬吓，所以要由窗台上床，床唔會造太高，下層恐龍仔話要加書枱同埋書架喎~ 媽媽就想要兩個櫃桶仔方便恐龍仔自己換衫。設計師嘅構思係海陸空，媽媽會買飛機燈放响呢間房..

呢度就係工人+牛牛嘅城堡！呢間屋個窗台勁大，可以放到兩呢半單人床！而牛牛就係瞓上窗台，床尾會造個櫃仔，下層就係子床，可以拉出dd。設計師話，小朋友爬上爬落都無問題，唔會整親！
個城堡太多角位，要加底板先得..

再戰書展2011

朋友有兩張贈卷，恐龍媽決定再入場睇自己鍾意嘅嘢！
因為爸爸要陪恐龍仔學琴，媽媽先行出門。

去到灣仔，一心去行兒童天地入口，點知警察叔叔話無咗喎！左邊只可以出，唔可以入！
咁唯有又上返橋面行運啦...
上到去，見到有個小朋友+老人通道，仲嬲緊嘅恐龍媽同護衛叔叔講：我想去銀行呀~
就咁，攞完錢，入場！最嬲嘅係~~~ 警察叔叔講大話！個售票處仲响度，我仲見到有人行緊入去！！！

乜警察都可以講大話架咩？！

入到場內，隨便走走，買咗兩本書俾牛牛 (都知佢唔鍾意睇書架喇！)，仲有去思展買<基礎漢字500> ，之後，恐龍仔帶住飯盒入場，我地開完飯就入咗Hall 1行大運喇！

第一站，page one！恐龍仔第一次見到老鼠記者 Geronimo Stilton, 好似好鍾意咁，要媽媽買俾佢！

我自己就買咗兩本英文小說.. 都係睇開嘅作者，65折，好抵！

再行~都無乜特別，差唔多9點，要返屋企喇！

出到去，見到架紅van, $20去旺角，停隧道口... 3個人即係$60, 好貴，坐的士都得！不過算啦...大家都好攰喇！
出咗火車站，我地仲坐小巴返屋企... 都係第一次咋！懶到行10分鐘都慳返！

新梳化

新梳化落地幾日，兩隻仔好忙咁又爬又跳！
媽媽就好忙咁捉牛！

呢一晚，因為爸爸終於攞咗相機出嚟，我地終於可以影低傻牛牛有幾傻喇！

基本上，佢一上去就好興奮，唔扶嘢就咁行嚟行去！好驚！
呀~牛牛呢幾日可以自己行好多步喇！今朝落公園仔，自己行得好遠添！邊行邊笑..

咁哥哥呢？

佢都真係好鍾意嗰套智高FUN咁喎.. 好努力咁玩！等牛牛瞓咗，我地玩兒童科學今期個彈彈玻啦！

牛牛呢？唔爬梳化，就努力咁玩呢個扭扭玩具，仲未扭到第二下呀！

書展@2011

今年，係第一次帶恐龍仔入場行書展！媽媽當然好驚啦~ 最驚係甩繩，其次係話攰要抱！

於是，事前約法三章：(1)要自己行，無得抱 (2)要跟實/拖實媽媽，唔可以自己走咗去 (3) 只有$100揀自己想買嘅書，再多嘅.. 要扣印仔！

去到灣仔，恐龍仔已經急不及待要帶路：媽咪~呢邊呀！

仔呀~ 媽咪要帶你去特別通道呀~專俾小朋友行嘅通道！

十點正去到，順利買票入場，人唔多.. 第一站: 新雅！

今年恐龍媽攞唔到75折卷，又咁多年都未入會，所以，只得8折！恐龍仔一手已經抱實兩本CARS！ 另外，我地仲買咗兩套圖字咭俾牛牛 (蔬菜水果、動物世界)，d圖好靚，唔係太細張，一面字一面圖，美中不足嘅~係台灣貨，唔係用香港式中文 e.g. 熊貓 vs 貓熊！三文治 vs 三明治！
同個後生女售貨員講：我都係唔要全套喇 (成套有十個主題架！)因為係用台灣中文。
佢話：唔係呀！
小姐，我唔係話佢有台灣注音呀！
另外，推介：你是我的奇跡！一本媽媽講故事時嘅好書，一定好感動 (自己喎~ 唔係個仔！ 哈哈~)
仲有~ 親子營養大作戰~~ 係講唔同嘅營養架！

第二站~ 小樹苗
中文書： 兩本口袋裝嘅謎語書；找不同；左腦IQ up up (4-5歲)-- 恐龍仔好鍾意！
仲有摺紙書，左/右腦開發訓練營；仲有媽媽至愛： 60創意科學遊戲！其實有3本差唔多嘅書，我地買咗最淺嗰本，但其實有本深少少嘅，一樣價錢 ($140)仲攞咗好多獎添架！不過... 如果大少唔鍾意就煩喇！都係唔好買咁深住！
好喇~ 10本，75折！

再行~ 發現小樹苗有一個小角，有英文書！第一睇見到嘅係Brain Quest! 售貨員哥哥話"買3本就7折" 嘩！好抵呀！
我地仲揀咗8本readers ($100 for 4)

差唔多喇，車仔就滿喇...

俾恐龍仔見到logico 同埋智高FUN~
恐龍媽見識過logico, 恐龍仔好鍾意，但係好似淺咗d... 但智高FUN呢~好似由淺入深喎！
玩咗好耐.. 雖然話買哂兩套再平$200，不過都係算喇！因為恐龍媽知道有達地方賣logico平好多！哈哈~
不過~ 智高FUN有個缺點，就係有losing parts, 恐龍仔返到屋企玩幾玩就已經.. 無咗兩塊！雖然... 話兩年內包換啫，都煩架！

其他，仲隨便買咗幾本學林嘅練習書 ($100 for 5)

再隨便逛逛，揾唔到舊年賣日文書嘅檔口 ，唔記得去揾<基礎漢字500> (失敗！) 恐龍仔基本上見到玩具就停低唔願走！

場中，各大貴價教材都有參展，其中English times嘅sales問恐龍媽：想唔想小朋友自己讀書呀？
已經係啦！(仲要唔駛買你嗰d幾萬蚊嘅教材添呀！)

如果，可以自己一個去多一次就好喇！

新版頭相！

要多謝恐龍爸，因為又係佢嘅傑作！恐龍媽懶 (or 太忙？) 根本無諗起要換畫！

呢張相，恐龍媽有份揀架！因為~ 呢兩兄弟好少一齊笑~又俾我地影到嘅！好多時，一見到相機，大嗰個就作怪！細嗰個就撲埋嚟~搞相機！

呢張~兩個都好開心！

整到呢張相，亦都係新居set好電腦同網絡嘅見證，希望其實嘢都慢慢一樣一樣咁歸位啦！

 

搬屋大日子

一早醒咗，開始勞動：安排好牛牛去婆婆屋企避難，執埋d手尾.. 打去叫外賣早餐..

呢次係我第一次搬屋，用嘅係朋友介紹嘅搬屋公司，我地揾咗3間問價，呢間最平，本來恐龍爸話唔好揾間最平嘅，不過朋友用過又OK，就算啦！(另外報價最貴嗰間，話我地要兩架車，$4500，但朋友60箱嘢，佢地報$3000！勁兒戲！)

眼見~ 負責聯絡嗰位哥哥好後生，佢地手腳好快，好小心，好高效率！我地仲响後面包~包~包，佢地用咗一個鐘就清哂場，d什物多到幾乎爆車！總數~40箱+15大袋，仲有d零碎雜物。

哥哥唔係出出入入搞搞震，就係自己一個睇書！中午食完飯，就被打發出街玩，唔俾上樓！因為太多什物喇！等大人清理一下現場先啦！

最後，叫做清咗一半嘢，搞掂廚房 (好細呀！！！) 床同浴室，解決基本需求，就~ 瞓覺喇！

日出(2)

真係好靚！

別了~~~~

忙~搬屋

呢排，去到搬屋project嘅最後階段，好多嘢要搞！好似水電煤錶，改地址！confirm傢俬搬屋時間流程，book平台搬屋，當然，仲有執屋！

瞓少咗，個頭成日痛！

最慘嘅，係牛牛作病！唉~

點解要呢個時候病架？！都好~星期六唔駛帶佢去playgroup，時間好用d！

so far.. pack咗大約二十個紙箱，其中8-10箱係書，會暫時入倉。基本上，爭d衫呀~被呀~未入袋，仲有廚房d雜物未入箱，都執得七七八八喇！唔明點解朋友們搬屋，一個要40個箱，一個要60個箱！唔通佢地d箱好細嘅？！

pending list: 去郵局搞re-direct post, 俾agency fee, double check佢搞咗水電未.. 仲有好多地址未改！

聽晚執埋d衫.. 同埋睇吓有無玩具唔要！

差唔多喇...

牛牛，快d好返喇！

 

點解~點解？！

執屋到中段，間屋已經好亂，但呢晚媽媽返到屋企，發現..

點解d書會响門上面嘅？！
唔係一本，係兩本！分別响媽媽房門同埋浴室門上面！
用嘅，係恐龍仔嘅名字貼紙！


到底，佢做緊咩實驗呢？！

HKUGA + YW 簡介會

 

最近，去聽了HKUGA的簡介會，很高興聽到學校宗旨係提供愉快學習經驗，同時又注重培養孩子的價值觀和德育！

小司儀在台上說：嘩~我地喺呢度讀書，真係幸福呀！

校長還解釋了DSS跟IB的問題！要收取政府的資助，學校就要跟從教署訂下的課程，不過，就用自己的方法去教，所謂校本課程，就是教署課程以外的，HKUGA加入IB國際化的元素，要培養一個熟釋中國文化的國際公民。

學校亦會照顧孩子們的差異，對他們的要求及附助亦各有不同，就連工作紙，亦可能有三個版本！給與能力上不同的學生不同的附助！

 

聽完，感覺很好，只可惜太遠了.. 見識一下還可以，為孩子報讀又是另一問題！

 

之後，因機緣巧合，有BK家長不能出值，轉讓了座位給我，於是，我和恐龍爸就去了snoopy校長的talk show。

英華，係一所歷史很久的學校，小學部近年於西九新校舍重開，起初是津貼學校，及後轉為直資，學費為$15000一年，算是超值！

整個簡介會，沒有一頁頁充滿文字的powerpoint，講述學校的資助，只有一張張孩子的相片，和一封封孩子寄給校長的信，帶給在座家長一點點男孩子的特質！

這是一所為男孩而置的學校，有著一班明白男孩patpat反地心吸力的教育工作者的學校。

不用台詞及口號，聽眾深深感受到這班小男孩是多麼的幸福與快樂！

 

還有，恐龍媽那剛掉了牙，手上還拿着占了血的紙巾，郤對着鏡頭笑的小表弟！校長說：男孩子就是這樣的，他們好奇，對很多事都充滿興趣！就連自己掉了牙也可以不理會！

哈哈~

 

YW portfolio: 10張紙，可底面用，無需要講有關天主教嘅資料，學校係基督教嘅。校長提示，唔好去參加面試班！

K1 成績表

今日，係恐龍仔攞成績表嘅大日子！

媽媽準備咗幾條問題，包括，我地欠咗d乜而攞唔到優異獎！係呀~ 事前，恐龍仔已經話自己攞唔到優異獎架喇！媽媽亦收到風，每班得4個優異獎。

見到班主任，第一時間俾咗成績表恐龍爸媽睇.. 老師一邊讚恐龍仔有進步，識得守紀律...

一睇~ 有兩個獎？！

老師解釋：佢成日畫花我d功課，我都好想俾個優異獎佢，但係又過唔到自己嗰關... 其實勤學獎都係全班得4個架咋！

媽媽即時諗起霖霖媽媽，佢已經話我地d功課唔應該做成咁...媽媽應該多花時間，要小朋友做得整齊d~~

老師仲一再強調，呢隻仔好有潛力，可以做好d架！

响老師面前，我地又再次肯定、讚許恐龍仔嘅進步，希望佢可以繼續做隻乖乖豬啦！

 

恐龍媽一直覺得，小朋友係應該學識做功課係自己嘅責任，媽媽只會檢查一吓做完未，提點不足，如果小朋友唔願改正，就等老師俾低d分囉~~~

但係眼見小一入學競爭咁大，都係要睇睇功課，出年攞返個優異獎同校長信安全d..

 

 

I can STAND!

牛牛可以自己企起身喇！

唔駛扶嘢~ 好叻叻呀！

不過 行路都係唔多穩，行幾步就坐喺地喇！

兄弟相殘

從來，牛牛去搞哥哥d玩具，哥哥總會尖叫或動手，初初牛牛平衡較差，媽媽真係好心痛架！

呢排，牛牛大力咗，可以爬高爬低，佢開始發惡喇！每當哥哥尖叫，佢會喊~ 如果哥哥郁手還好... 牛牛唔怕喎！

只要牛牛唔搞哥哥d玩具，牛牛係安全嘅~

但係，哥哥一樣會搶牛牛嘅玩具！唔俾佢玩，咁~牛牛就會發惡，有時~ 仲會搶返件玩具，有時，仲會打哥哥！

尋晚，牛牛好大力咁打咗哥哥塊面兩吓！哥哥面仔紅哂！

唉~

仲有，哥哥少少嘢就話牛牛曳曳！仲自己作曲自彈自唱"牛牛曳曳"歌！

我地都無話佢曳，佢係响學校校車學返嚟架！

你地兩兄弟，相親相愛得唔得？！

又一傑作！

今晚，媽媽返到屋企，見到枱面..

簡直唔相信自己對眼！
工人話係哥哥自己砌架！佢無幫過手，响廚房出嚟睇見到覺得好amazing!

真係... 一個4歲人仔會諗到d咁嘅嘢嘅？！

爸爸爸爸爸爸爸~ Buuuuu~

今晚，如常湊牛牛去車站等爸爸。

傻牛牛依住玻璃企响閘外，d人出閘，佢望都無望，直到見到爸爸，牛牛轉頭望住！

爸爸抱起牛牛，媽媽慣常教佢"爸"啦~

呢次，佢真係爸呀！

仲要係：爸爸爸爸爸....BU~ (爸爸成面口水！)

一次都未夠，牛牛繼續：爸爸BU~

哈哈~
開心死爸爸，笑死媽咪！

因為，呢次係牛牛第一次"爸"呀！

邊個話我地似樣？！

咁都叫似樣？！

無嘢講！

當然，一定似樣過街上面其他小朋友嘅~


哥哥真係... 成個model BB咁！

牛牛@14mths

一路懶~ 無寫牛牛嘅進展！

其實牛牛啱啱行到幾步~ 啱啱肯玩吓玩具！

最近，仲鍾意學媽媽放嘢上頭頂，扮戴帽！

同埋鍾意講電話..

捉住隻老鼠都可以：喂~喂~

仲有~ 鍾意手指指，點蟲蟲，攞媽媽條磁性頸圈嚟玩！
到上playgroup，串嘢難唔到佢，但當然，手指仔未係好靈活，要大人幫手先可以串返出嚟啦！

講嘢無乜進展，但聽指令有明顯進步，一時時肯飛吻、byebye、arms up...

依舊大脾氣..

越嚟越鍾意痴實媽咪！

另外，牛牛開始唔鍾意食自己碗粥仔！煲稀d又好似好d，但係咁大個仔，無理由仲食粥架？！佢最鍾意食大人飯... 真麻煩！

平時，就最鍾意食星星餅，仲識得請媽媽食..如果係第二個，佢唔請架！