玩完水，我地去咗公公婆婆屋企，哥哥跟爸爸去圖書館，為2nd in作準備，牛牛就瞓覺，恐龍媽就去四周行下！聽聞油塘開咗個新商場，於是就去8下喇！
油塘，係恐龍媽細個時經常出入嘅地方，嗰度有讀過年幾嘅幼稚園，6年嘅小學，仲有公公辛苦經營多年嘅工廠。
行行下，行到一處天橋，眼前嘅風景令我好大感觸！
基於作息同返學安排，一路無機會帶牛牛去接觸一下” 沙”
記得當年對泥塑好抗拒嘅恐龍仔，去到沙灘係完全無問題嘅！連熱身都唔駛！
到牛牛喇，會點呢？佢唔怕泥塑架！
呢次，係恐龍媽連同公公婆婆帶住兩隻仔去大清水，呢個天時人唔多，天氣簡直係風和日麗！而牛牛呢？佢對腳話我知~佢唔太OK咁！但係~好在無喊
！
乾沙唔知，咁濕沙呢？都唔係幾自在喎~
見佢成日做樹熊，於是媽媽就陪佢去水邊玩，浸下腳仔、踢下水，幾分鐘之後，牛牛大有進步，識笑喇！之後行返上濕沙都無問題，仲唔捨得走添！
呢次好多謝公公婆婆陪我地癲！哈哈~~~
踏入十月，各私小直資紛紛開始面試喇！呢個週末，我地見咗兩間學校，交咗一份報名表，仲有4間已/將報名嘅學校未見！
恐龍仔報小學以來，都無分享過關於報名嘅事，因為恐龍媽好努力學習中，但到咗依家，開始見到自己做得唔夠嘅地方，或者唔好彩嘅地方，可以寫落嚟俾後人睇！
報小學，第一步當然係留意學校網頁，睇吓有無簡介會，同報報名資料啦！我做咗個excel，mark低所有有用嘅資料，可能包括學校網頁，公報詳情嘅日期。
另外就係要上教育王國收風！有d學校會突然開始網上報名，如果唔可能日日上各學校check的話，上EK都係好有用嘅方法！
另一樣嘢就係，點樣响10月呢個大熱面試季節，避免撞時間呢？其實大部份學校係會以先到先見嘅方式排嘅，但亦有學校可以俾家長揀時段，所以必需先了解各校嘅面試日期，然後就好好把握交表嘅時間，減少撞期！
以下係我地報嘅幾間學校嘅情況：
YW ~ 8月尾9月頭1st in，先交表先見，之後仲有2nd in同3rd in，最遲公報結果
GT~暑期就要面試，同時會分別面見家長同小朋友，9月出conditional
offer，1st waiting同conditional offer嘅家長需要去上家長班，一個月一次，需要有8成出值率，小朋友先可以响6月註冊。
SFA~9月中星期六排隊親身交表，兩個星期後(十月第一個星期六) 面試，早到早見，2nd in係11月第一個星期六，要見家長。唔收portfolio
St Jo~十月第一個星期六排隊交表，安排兩個星期後 (即第3個星期六，撞St paul boys同KTS) 面試，得上午嘅時段 (9 / 10 / 11/ 12/ 13點，共5組) ，老師會問家長某時段得唔得，如果唔得就排另一條隊，佢會9->10->11->12->13咁樣輪到去分組，所以早排同晏排係無分別，不過要留意嘅係：因為呢日個個撞到傻，好多家長要1pm呢個時段，到最後，恐龍媽聽到老師話:分埋呢組，其餘人嘅唔夠開多組，全部去9點啦！而到嗰刻，排緊1pm嘅人有大約20個，唔知係咪我誤會咗喇，但聽上嚟唔似俾哂佢地1pm見囉！另外，報名編號最後係到9xx！唔收portfolio
KTS~有成個幾星期交表/郵寄，面試係十月第三個星期，唔清楚排序方法，因為我地尾二尾三嗰日交，但in 10am！
CKY~呢間係上網報名 (有約兩個星期時間) ，有兩日(十月第二+第三個星期六)，分別各五個時段選擇 (9am/10:30am/12nn/2:30pm/4:00pm大約係咁~) ，即共十組，然後需於之後一星期之內親身交文件。恐龍媽一時大意，無去check清楚其他學校將會幾時面試，手快快揀咗第三個星期六嘅十點幾，呢個時段最快full，可惜過兩日就收到KTS公報嘅面試時間！撞c咗！唉~~~
男拔~星期六、一、二排隊交表/文件，記得跟足報名指示，要去銀行排隊入數！面試日係十月第二個星期嘅星期四、五、六，可以揀語言，廣東話組別响最後嗰日最早交表，係in星期六嘅晨咁早
(8:30am報到) ，同日交表嘅英文組就in weekday (唔記得邊日喇！) ，推測可能第一日交表就in星期四，第二日就in星期五。交去嘅portfolio，第一輪係唔會睇嘅，如果入到2nd in，到時校長先會睇。
APS~網上download form，唔同時間download嘅表格，要响唔同日子嘅am親身交表/文件，但係佢個網成日down，再交表係幾個星期之後 (十月尾) ，再面試就响12月頭，可能咁樣可以見少d人啦！
TSL~網上一早公報報名時間，有兩日揀 (十月第一個星期嘅星期六、日)，可以揀埋am or pm，因為其實學校唔會in星期日，所以星期日嘅時段好搶手！另~原來12點都算係pm，大家留意！如果你唔想見12點哂話，就唔好一開波就去搶喇！之後要親身去交表。唔收portfolio。
12點幾，收到家中來電：有人放學返到屋企，踢甩對鞋，飛上天花，擊中飯廳吊燈，3支金屬支架，斷咗兩支…
慌忙間，恐龍媽只識得打俾恐龍爸，知道要買燈，但邊個返去教佢地呢？盞燈隨時跌落嚟架！
恐龍爸起初不願回家，亦不想找工人去拆，裝燈嘅又未必會咁快到….
公公又來電：淨低嗰條支架都斷咗，得條電線頂住！佢用膠帶縛起吊燈，希望幫幫到手啦！
最終，恐龍爸返咗去，拆咗盞燈落嚟！
又因為鋼琴老師在場，無開殺界..
而恐龍媽就去咗公司附近唯一一間燈飾鋪放血，買咗一盞3千幾嘅水晶燈，師傅會3-6點上去安裝！
返到屋企，盞燈又真係幾靚，哦咗個曳人一輪，就算喇！到恐龍爸返到屋企，除咗訓話之外，仲打咗一下手掌！
希望受過教訓之後，呢位小朋友會肯聽大人講，唔好公公一邊講住唔好踢鞋，都仲要踢，唔好再闖禍喇！
呢晚係優才家長講座第一講，由陳校長講講資優教育發展。
講座準時七時開始，有多達四百多個家長參加，部份父母都到，所以相信學校出咗大約300個conditional
offer + first waiting，中段有餅乾小食及樽裝水供應！真係細心！九時前散場，陳校長預告：應該第三至第四堂開始，會少好多人…（其實呢個真係一個好好嘅方法，測試到家長嘅誠意，但係如果真係打算放棄個位，唔需要搞呢類講座，家長都會寫信去學校退學啦…但好坦白講，我好欣賞學校呢份誠意！可以俾家長更了解學校嘅教育理念，同埋核心人物嘅想法！）
陳校長參與資優教育超過十年，講座內容句括咗IQ test嘅發展史，IQ結果，可以推算到小朋友可以讀書讀到幾高學歷。
陳校長仲一再推介洪蘭嘅作品「教育創造未來」俾在座家長，並一再強調多選擇並非好事，報太多學校，其實係浪費家長時間，同時亦浪費學校資源！（但係，我地唔報咁多間，咁無學校收，又無運行嘅時候，點算喎！）
優才提供唔同level嘅分組資優課程，部份係課後班，小組分成IEP (2%) 1-2人，SGP (5%) 4-8人，AGP (10-15%) 8-12人，TC (100%) 12-25人，能力越高嘅小朋友，會得到相對小班的分組資優課程，而top 2%嘅小朋友，更有機會得到個別授課！資源上，呢間學校的確花咗好多時間精神去栽培個別小朋友嘅潛能！
話說，一早打算報某男校，一早記低下載報名表一期！但大頭蝦媽媽竟然忘記咗！要到學校小一講座，有家長講起先上網睇睇~ 噢~過咗期！
但神奇嘅係，學校無將張表格清除，雖然過咗期，但仍經可以下載！
跟住落嚟，就係要print 所需文件，排隊入數，同埋交表！
因為恐龍爸响旺角工作，好多時交表嘅重任就落响佢身上，加上佢話自己去銀行唔駛排隊，咁我嘅責任就係提醒佢去入數啦~
點知~ 2pm收到佢嘅通知，佢唔得閒！
可憐嘅恐龍媽唯有响公司飛的去銀行，再飛的返公司！好在~阿頭唔响office！但係，當去到銀行時，老板個秘書打嚟，老板搵我！！！好好彩嘅係~ 咁啱老板忙緊，到佢再得閒，我已經上咗的士，電話一響就叫司機熄收音機！
平安過渡~
但恐龍爸公司隻鑊好似未搞掂，工作至零晨！雖然學校就响佢公司附近，但係~又要恐龍媽出馬，晨咁早去到排頭位！
想講，學校嘅保安好友善，面帶笑容，好有禮貌！相對之下，校工姨姨就真係…好唔友善！
話說學校將有蓋操場用作排隊之用，放咗好多圍欄，拉咗膠帶，而頭位嘅一邊有d大石，可以坐下。而呢位無聊嘅校工姨姨竟然行埋嚟，移動圍欄，令到大石變成响膠帶之外，咁我點坐呢？！佢係咪玩嘢呀！？
到差唔多9點，校工放咗50個家長上樓，問過應考語言，安排就坐，等等等~ 9:10先開始埋位交表對資料！！
最後，又打的返工！好彩準時到達！
報學校，先係浪費地球資源，再嚟就係浪費光音，仲有金錢，手上仲有4份表格要交，其中兩間學校仲要係得一日交表，諗起都覺得辛苦！
學校對N班嘅小朋友，實施漸進式適應週，由家長陪上堂，到家長坐課班一邊睇，然後第4日開始就要出班房，今日第五日，第一次要自己行入學校喇！
其實就算有家長陪，有d同學仔都會喊，但恐龍媽就第一日已經响下半場坐開少少 (實在太多人，迫唔到埋去，不如坐開啦！) ，到第二日工人姨姨陪牛牛，佢都無出事，第三日坐開，好多小朋友喊，第四日要出課室喇，小組有十個小朋友，得三個無喊！牛牛真係叻叻！估佢唔到！佢平時好嗲，少少嘢就喊定先架！
到今日，第五日喇，首先去送哥哥校車，然後由爸爸帶返學校，然後要自己行入去…
會點呢？哥哥當年都喊咗成個幾星期架！
結果~
牛牛無喊！嘩！牛牛真係叻叻喇！希望繼續到啦…
