遠足植樹日

星期五睇見呢個活動，好想同恐龍仔去，於是問准恐龍爸，佢湊牛牛游水，恐龍媽就湊仔去行山！

咁~ 問吓恐龍仔：你想唔想去植樹呀？要行4個鐘頭架喎！

恐龍仔答：好呀！想呀！

俾埋地圖佢睇，有埋等高線，解釋埋：上山嗰段好多係梯級！

恐龍仔依舊係：想去呀！

 

就咁，我地星期日朝早就出發！

 

頭段就係行咗成個鐘石頭梯級，有好幾個姐姐仔中途放棄，但係呢個仔~ 完全無問題！

反而做阿媽嘅，頭髮尾都濕哂，好辛苦！

之後有段好多泥嘅傾路，呢段山路如果落山遇對頭行，真係好危險！

所以我地決定落山時行馬鞍山落！

行咗個半鐘~到喇！

 

落山時，風景好唔同，有流水，好靚！

 

但恐龍仔開始攰喇，行得好慢，停咗好多次... 落到山都差唔多行咗頭尾4個鐘

媽媽都攰死咗！