最近，响科林見到一個初生bb，半邊面紅腫，家人說醫生用過產鉗，所以瘀咗！
細問下，再經曾任哂中環名產科助護嘅同事確認：試產多時bb未出，再緊急開刀嘅bb，好多時都會瘀，但半邊面就真係少見。
bb面上無明顯硬物壓痕，似係响產道受壓引起…
但家人似乎只對醫生不滿，甚至有人建議投訴到底！
試問：如果响如似緊急情況，醫生唔用產鉗，咁bb會點？！
如果醫生只作常規動作，就好似幫媽媽做緊急開刀，如果媽媽有拼發症，係咪一定係醫生嘅錯？
可能，我生兩個都太多事，bb出世變熊貓眼，都覺得好幸福！
我太理智，我反而擔心呢一眾過慮親友，會唔會影響媽媽嘅情緒呢？！
生日願望，竟然變咗希望bb快d好番，世界人人遠離怨恨，學懂體諒！
同以往比賽一樣，陪仔玩嘅心情幫恐龍仔報比賽，帶佢去玩。
今次心情有少少唔同，因為就嚟要叩門，整理portfolio、update資料嘅同時，發現仲有一項賽事已報，好希望儲多d” 閃咭” ，令學校更了解呢個小朋友。
呢場比賽係自己棋院協辦嘅，相比上次幼稚園組都有過百人，呢次唔算係大賽事，亦唔係圍內賽事。今日賽程分5回合，恐龍仔無乜壓力下入去玩。
間場時，其他小朋友會玩電話，呢隻仔就睇書或者走去練習區自己捉棋！
頭3局，恐龍仔同女同學都係3局勝，到第四局，分別坐table 1同table 2，兩個都贏！最後一個回合，兩個被院長點名話有潛質嘅同班同學對賽…兩個阿媽就响外面又興奮又緊張…恐龍媽一路同屋企嘅恐龍爸whatsapp, 恐龍爸話：近期佢兩個對奕，阿仔都係贏多輸少！
場外嘅家長出盡法寶，希望由窗口望到裡面嘅情況…同學仔爸爸話：睇阿女嘅表情，應該輸咗！
好緊張~好緊張~
恐龍仔終於出嚟喇！媽媽忍唔係抱起隻仔轉~
太開心喇！
題外話，好欣賞沙田圍胡素貞學校，佢地意然將校園嘅一個角落用作圍棋用途！恐龍仔見到，真係唔捨得走！
到頒獎禮時先知，原來呢間學校小一必修圍棋！唔怪之得舊年十月某日由恐龍媽見到院長，問佢沙田區邊間小學重視圍棋，佢答沙胡啦~
比賽完咗，個傻仔抱住隻盃唔願放，街上嘅路人都讚：乜咁叻仔呀~咁大個獎盃！
人人讚叻仔，媽媽就話：你好努力呀！
恐龍仔唔明媽媽講乜，問點解~
於是媽媽就話：因為你比人多練習棋譜，多睇書，加上少少運氣，所以贏咗！我地如果只靠少少天份但唔用功，可唔可以有成果呀？(佢話：唔可以) 所以今日有成果，係因為你嘅努力囉！
(偷師自<教養大震撼> - Nurture Shock)
孩子，好希望你明白，比賽唔係為咗贏，而係為咗個過程！如果你真心喜歡一樣嘢，輸贏唔重要呀！當然得到認同係件值得高興嘅事！
媽媽唔係為咗儲獎所以幫你報名比賽，爸媽係真心想你出去玩多d，學嘢！
加油呀！
舊年，機緣下見到菇菌圓開種菇班，可惜當時我遲咗，一年一度嘅班已經開始咗！
等咗一年，終於又開班喇！
第一堂，係環保嘅簡介，睇咗幾段關於天氣改變引起嘅動物、環境生態問題，然後係工廠式農場，與及肉類屠宰、包裝，動物餵食等實況，最後係種植棉花嘅過程，落好多農藥！！！
睇完，好啱時候…正好係我減肉食而多食菇類，加深我抗拒肉食嘅感覺！
食菇~已有足夠嘅蛋白質，可以代替肉類！
呢樽係平菇，佢有大約3星期大，希望佢快高長大啦！
菇菌圓現時响香港有機栽種3種菇，特別之處，係响香港氣候之下，唔需要再俾菇菇涼冷氣！環保也~
http://ecomushrooms.org/active08.html
星期五睇見呢個活動，好想同恐龍仔去，於是問准恐龍爸，佢湊牛牛游水，恐龍媽就湊仔去行山！
咁~ 問吓恐龍仔：你想唔想去植樹呀？要行4個鐘頭架喎！
恐龍仔答：好呀！想呀！
俾埋地圖佢睇，有埋等高線，解釋埋：上山嗰段好多係梯級！
恐龍仔依舊係：想去呀！
就咁，我地星期日朝早就出發！
頭段就係行咗成個鐘石頭梯級，有好幾個姐姐仔中途放棄，但係呢個仔~ 完全無問題！
反而做阿媽嘅，頭髮尾都濕哂，好辛苦！
之後有段好多泥嘅傾路，呢段山路如果落山遇對頭行，真係好危險！
所以我地決定落山時行馬鞍山落！
行咗個半鐘~到喇！
落山時，風景好唔同，有流水，好靚！
尋晚心血來潮，好想整包包食！於是去睇睇有無yeast啦~因為先前嗰d好似買咗好耐，好似已經俾我掉咗！最終搵唔到，我對附近嗰幾間要行15分鐘先去到，但又細嘅超市無乜信心.. 唯有去taste買啦！
望住兩隻品牌嘅yeast：一隻本地貨，一隻來佬貨，價錢相差超過100%！最終…都預咗出到嚟係送上門俾人搶錢架喇，買隻貴架啦！
返到屋企都10點半，即時開工！今年揀咗一個蜂蜜藍苺乾麥麭嘅食譜，將佢變身成~楓糖紅苺乾麥麭~
搓好就放入雪櫃~
6點起身就放入暖焗爐內，再攞出响造形，跟住放返入暖焗爐內40分鐘，七點正開爐焗200度15分鐘，170度15分鐘~
味道剛好！
只係大老爺話可以做得鬆軟d~
鬼唔知咩？！ 唔夠時間發酵嘛！
一轉眼已經食咗3/4喇！哈哈~
呢個比賽，係由一間有好幾間分校嘅棋院攪嘅，因為佢地學生多，所以參賽嘅人都多，而且當中唔只圍棋，仲有國際象棋同埋象棋，所以參賽人數有八百多人！
而恐龍仔參加嘅係幼稚園組嘅圍棋比賽當中嘅B組 (每組約50人)，時間係11am至6pm，都好長時間，而且家長係唔可以入場架…. 難免有d擔心！
上午有兩場，恐龍仔都贏！到下午嘅第三場，開場前家長可以入去影一下相，當媽媽發現佢坐table 1 (約有6人之前兩場勝，即頭3枱) ，一話佢知，佢就開始緊張，喊起上嚟！話自己呢場一定輸喇！
場外，遲遲未出結果…到第五局要開始，先知第三局嘅賽過！心急嘅媽媽見到恐龍仔再贏多局 (呢局後會有3人係全勝) ，真係好開心！
到第六局快要完場嘅時間，終於有第四同第五局嘅結果：WWWLW
好緊張！因為得一組得8個有獎，而如果恐龍仔第六局勝，就一定要等領獎，但如果輸嘅話…應該好多人會係4勝2負 (50人6局當中4勝或以上=18人) ，咁啱附近有個家長問工作人員：同分點分名次？
工作人員：睇吓邊個贏過高名次嘅嚟分
咁~最後~放小朋友離場當中，無恐龍仔，我就問識嘅家長義工：恐龍仔最後一局坐table 3，被hold住，應該有獎！
場外嘅媽媽…又緊張又開心！
最終，恐龍仔最後一局輸咗，第六名，但因為佢贏過第4/5名嘅小朋友，所以佢係4
局勝嘅首名！
呢個小朋友攞獎時極度唔合作，排隊時不停亂講嘢，上到台上影相唔合作！激死人呀！
對於一個小朋友而言，除咗有人同佢捉棋之外，就係得到見識嘅機會！而佢阿媽…繼續無無聊聊陪太子捉棋…
