青青世界 Day 2 + Day 3

第二日，恐龍仔6點幾就醒咗喇！因為落咗成晚雨嘅關係，我地上唔到山，一早，去咗食早餐！早到無乜嘢食！

臨走~ 唔記得攞恐龍仔個背囊！唉~ 响大陸，當然無得剩啦！我地10分鐘後發現已經太遲喇！

呢日~ 第一站係釣魚！恐龍仔堅持要釣，咁我地訂房時包咗，所以咪俾佢試試囉！唔夠15分鐘就無哂興趣，走人！

下一站，我地去咗世界之窗！青青世界得一部公車會上嘅，而呢路公車係會去世界之窗！不過~ 我地有老有嫩，都係打的好d！咁~ 都係RMB$38~ 入場費，老同嫩都免費，咁就得媽媽同婆婆要俾全票RMB$140，入到去，恐龍仔話要坐火車，呢次無咁jetso, 係細嗰個免費，行咗一圈，感覺上好似大過HK Disney！

落咗車，行行吓就落雨！行吓落吓咁，到中午，恐龍仔開始不受控制，我地雖然行唔駛，但係都要走喇！出得"城"，就當然無咁易番歸啦！我地坐地鉄去少年官書城！第一件事就係醫肚！然後就直入兒童書部份~

恐龍媽俾咗個budget恐龍仔: RMB$50以內，要俾媽媽睇過OK先買得，返去要扣印仔！

恐龍仔揀咗本100以內加減數嘅練習唔放(RMB$4)，媽媽揀咗幾本書佢都唔多鍾意，最後，我地買咗一本交通工具嘅書(恐龍揀嘅) 同埋兩本關於大自然/科學嘅書！

仲有，恐龍仔揀咗本書俾牛牛！

恐龍媽自己就隨手見到兩本幾出名嘅書就買咗喇！分別係 Raising Boys同埋 How to talk so kids will listen & listen so kids will talk。當然係中文板啦！

恐龍仔不停叫話要返507，於是~ 又打的！呢次~ RMB$6x。

我地呢日嘅活動差唔多喇~ 恐龍仔唔想再出街，只想响木屋裡面爬上爬落，睇書，呢個時候~ 佢已經自上自落，練習順熟！

呢晚，好快瞓着…

第三日，無乜活動，起身之後行咗一陣山，食過早餐，就入園玩沙！(好"蒙"呢！)

係~唯一活動！由無人玩到過咗幾班幼稚園/小學生！差唔多玩咗一個鐘，唔多願走！但係真係怕悶壞公公婆婆，所以~ 都係要走嘅！

返去換衫，執好行李就check-out，打的去褔田口岸過關 (RMB$6x)！因果係上午，無乜香港人！好快過到關，12點幾就返到屋企喇！


至於，點解無相睇嘅？
因為~ 相機响第一日已經用哂d電囉！公公部機係nikon機，我地用開cannon, 真係唔知可唔可以攞返d相！唉~~~

另外，恐龍仔睇見個無水嘅泳池，話5月要嚟游水喎！媽媽話：如果乖嘅話，再同恐龍爸商量吓啦！

恐龍仔呢幾日氹到公公婆婆好開心~當然仲有媽媽啦！佢話：我最鍾爸爸！最鍾意最鍾意媽咪！！！
哈哈！