BB相~

哥哥@10.5mth

牛牛@10.5mth

點睇?! 不停有人話佢地似樣.. 又不停有人話牛牛似媽咪，但哥哥時，個個都話兩個都唔似！咁~即係點呀！？

花仔~ 預備編

下星期係Vicky姐姐大婚日子, 咁啱媽媽有個中學同學今日响中大行禮，於是，媽媽唔放過呢個大好機會，等大少見識吓咩叫"行禮"先！

首先，係呢套响淘寶買返嚟嘅西裝，媽媽嫌佢有d casual，所以今日用嚟襯牛仔褲，叫做著吓唔好浪費嘛！

靚仔到呢~~~ 其實佢笑係幾好睇嘅，只不過平時好少肯俾個笑樣你影相！

之後去咗書店買咗幾本書，但係呢本就唔肯放低，係要攞住睇！

算係好合作.. 仲要書不離手！

問咗人，上到教堂門口，我都早咗少少，上一場仲未走，恐龍仔埋去同人地架花車影相！

影吓後先~ 呢個袋仔係咪幾靚呢？！

我地响附近行吓，見到條小河。

恐龍仔問：d水飲唔飲得架？

未等到婚禮開始，有人話要飲維他奶！但附近無汽水機喎~~ 扭計！好啦~行返去大學站買啦... 點知，我地遇見Vicky姐姐！
食飽~恐龍仔主動話上返教堂觀禮。

婚禮進行中...

可惜婚禮進行期間，呢隻人仔無停過，一時又話邊個講嘢咁大聲，一時又搞d詩歌書，一時又爬嚟爬去，大叫！行出行入幾次，但係佢又話要影埋相先走，咁點呢？最後，終於肯走喇！

再次祝福呢位上堂時會同恐龍媽"角力"嘅男同學，祝你倆幸福快樂！

希望過幾日到Vicky姐姐時，天氣都好似今日咁好啦！

又買書喇

行書店, 一眼見到呢本書, 打開見到像型文字, 即刻俾恐龍仔睇.. 之後再無放低過, 仲不停咁錫本書!

中英文識字魔法書(附漢語拼音)

★ 每頁學習一個生字並配上相關插圖。
★ 中英雙語，附漢語拼音。
★ 介紹每一生字的字形演變，以及有詞語示例。

簡直係: 愛不惜手！

仲有呢本都好有趣.. 
兒童好奇心大百科

  

魚也會睡覺嗎？螃蟹為什麼只能橫著走？

為什麼會做夢？天空為什麼是藍色的？

為什麼會有彩虹？船為什麼能浮在水面上？

翻開這本書將能滿足小朋友們的好奇心。

用簡單嘅文字, 解釋一d小朋友經常問嘅問題!!!

另外~ 我地仲買咗幾本<親子枕邊100故事>，之前買嗰兩本，恐龍仔鍾意得不得了！晚晚講住同一個故事，呢次佢發達啦，有咁多新故事聽！

難得返到屋企，恐龍仔同媽媽講：多謝你買咁多書俾我呀，我好鍾意呀！

濕疹牛轉豆奶 Day 2

兩日前開始食豆奶, 尋晚睇佢都，面仔已經唔紅，手臂兩邊都乾哂，無紅喇！

今朝再睇，真係好咗好多！

諗返轉頭，其實自從食少咗媽媽奶，食多咗奶粉，牛牛嘅濕疹明顯係差咗，都係時好時壞，但係面積比之前大好多，係越嚟越大，本來手臂上每邊兩三個圈圈，依家係幾乎成隻手臂滿哂！

當初媽媽會怪自己係咪亂食嘢，所以牛牛會起濕疹，嗰時係肚皮痕，後期肚皮無事，但係塊面同手臂就越嚟越嚴重！

依家好喇~  希望有個了結！

20 Feb

22 Feb

24 Feb

咁都叫~ sharing!

爸爸諗起呢件大玩具, 於是搵返出嚟俾牛牛BB玩
恐龍哥哥又點會放過機會~ 玩"新玩具"呀?!
叫佢好好食飯, 食完就到佢玩.. 當然就唔睬人啦~

搶呀!!!!

話佢咩~ 呢個哥哥竟然話牛牛同佢share!  喺人地隻手搶走d嘢都可以叫share~ 服未?!

牛牛一副愛理不理, 完全滿足放手上嗰個波!
哥哥呢? 搶完玩具搶波波!

牛牛就.. 無得玩波波, 唯有搞哥哥囉!

好鍾意企嘅牛牛, 最後為大家耍兩吓太極拳

係兩吓咁多... 多謝收看!

過校門而不入

今朝9點幾，收到恐龍爸電話：老師發現口腔內有紅點一粒，恐龍仔要睇醫生攞咗醫生紙先可以返學呀！

上次係false alarm, 去到個醫生笑笑，話d人太過緊張喇，無乜計，寫咗紙俾我地，藥都無 (當然無啦~ 都無病！)今日又嚟，煩c人呀！

呢個星期開始，曳人要寫字，寫得好求其之餘，仲要唔願寫！

唉~ 一日唔返學，做兩日功課，諗起都驚！

黃昏，恐龍爸帶咗恐龍仔踩單車，玩得就邊會有病呀！睇得醫生嚟，返到屋企都八點，食得飯嚟... 仲要做埋今日d功課！係呀~ 老師俾咗功課佢帶返屋企呀！

呢排睇住佢做功課，爸爸黑哂面，恐龍仔就無嘅開心嘅親子時間，希望呢d時間快d過去，盡快適應"寫字"呢樣嘢啦！

順勢療法 與 心理測驗

今日，終於到我自己去見療師喇！其實都拖咗好耐，一路想準備好份Medical History, 寄咗俾療師先，咁就唔駛到時講咁多嘢啦！點知，寫咗~ 但無寄出！一路唔記得！拖到夠期再見西醫。

唉~

去到，講咗少少2007年之係發生嘅嘢，講吓生活，講吓感覺，大約用咗一個鐘左右就完成面見，療師開咗隻療劑俾我，仲有d花藥。

返到屋企，查吓呢隻療劑係點嘅，發現其中一本書話：typical remedy for workaholic mom.

其實順勢療法好特別，old school嘅療師鍾意開單一療劑，以每一隻療劑有佢自己嘅作用，係可以幫到一大堆"感覺"，要揾一隻啱嘅療劑，有d似你揾啱自己係九型人格嘅型號：對號入座！但係順勢療法嘅療劑就有過百隻！見完療師，睇見佢開嘅療劑，有d似做完心裡測驗，俾人性格分釋完咁…

其實見證過療劑對小兒敏感咳呢類較急性嘅病嘅療效之後，我會覺得呢樣嘢係有d料到嘅，但係對我自己嘅遺傳性疾病，一d慢性嘅問題，佢有幾好呢？真係唔知，特別係有d怕所謂"康復反應"，唔知會係點，唔知要捱幾耐，唔知停西醫會唔會有危險 （療師並無叫一定要停西藥，我亦無細問應該點解決呢個問題，會唔會有即時危險，所以…都唔會停西藥住喇~)