零用錢

自從哥哥小三開始，學校准去小賣部買嘢食之後，我就開始俾每日五蚊嘅零用錢俾佢，無乜特別，但團年時一位長輩好驚訝小三學生有零用錢！係呀~佢個小三嘅細仔就坐佢身旁，扁扁咀~

不如就分享一下恐龍家係點教理財，不過事先聲明：我自己一d都唔叻，唔係理財專家！

就好似上面講，自從可以响學校買嘢，就每個返學日有$5，呢個係一份燒賣嘅價錢，佢仲可以選擇滷水蛋、魚蛋，或飲品一份，所以呢個係一個合理嘅金額。

不過呢個仔唔為食，起初佢試過去文具部買咗枝鉛芯筆，俾我話咗佢幾句 (屋企又唔係無~)，所以佢其實無乜點用過，全部放哂响月餅盒！之後，試過經我買神探福爾摩斯... 又試過請家人食甜品，夾錢買生日禮物俾爸爸咁~

錢對於佢，的確係足夠，佢亦唔會孤寒、唔捨得駛。

另外，我地之前已有個貼紙計劃，對於思想成熟嘅小三學生，佢已經唔多在乎，但因為係兩兄弟都同時進行，哥哥對於"牛牛有"會比較緊張，所以，都係繼續。

呢個貼紙系統係獎勵所有正面行為，我想佢地做嘅嘢，例如，不善詞令嘅哥哥，如果佢講故事俾牛牛聽，就會有獎賞，另外，牛牛講故事俾媽媽聽都有！至於默書考試嗰d，唔係一定會獎，而係有特別成就先獎：哥哥差不多次次默書100分，但我會响學期埋單時獎一次！數學小測100分都有獎，學科考試95分以上，即係勤力+小心，會有獎！
當然，每個小朋友嘅"目標成就"都唔會一樣，到牛牛就要睇定d先...

而儲落嘅貼紙，响大時大節係可以換禮物，例如書展、聖誕節等。一個貼紙係一蚊，有時我會同佢地各一半，即係想買份大禮物，要$300，咁就要扣150個貼紙，餘數係媽媽送嘅禮物！又或者自費買經批准後嘅物品，好多時會係書。
依家連牛牛都知貼紙係錢，佢會好緊張，點解佢無零用？無錢包！？

之前幫哥哥開咗銀行戶口，之後懶，連牛牛嘅利是錢都入埋落去，嚟緊我會幫牛牛開過個戶口，分開d錢...