家長講座(一)

呢晚係優才家長講座第一講，由陳校長講講資優教育發展。

 

講座準時七時開始，有多達四百多個家長參加，部份父母都到，所以相信學校出咗大約300個conditional
offer + first waiting，中段有餅乾小食及樽裝水供應！真係細心！九時前散場，陳校長預告：應該第三至第四堂開始，會少好多人…（其實呢個真係一個好好嘅方法，測試到家長嘅誠意，但係如果真係打算放棄個位，唔需要搞呢類講座，家長都會寫信去學校退學啦…但好坦白講，我好欣賞學校呢份誠意！可以俾家長更了解學校嘅教育理念，同埋核心人物嘅想法！）

陳校長參與資優教育超過十年，講座內容句括咗IQ test嘅發展史，IQ結果，可以推算到小朋友可以讀書讀到幾高學歷。

陳校長仲一再推介洪蘭嘅作品「教育創造未來」俾在座家長，並一再強調多選擇並非好事，報太多學校，其實係浪費家長時間，同時亦浪費學校資源！（但係，我地唔報咁多間，咁無學校收，又無運行嘅時候，點算喎！）

 

優才提供唔同level嘅分組資優課程，部份係課後班，小組分成IEP (2%) 1-2人，SGP (5%) 4-8人，AGP (10-15%) 8-12人，TC (100%) 12-25人，能力越高嘅小朋友，會得到相對小班的分組資優課程，而top 2%嘅小朋友，更有機會得到個別授課！資源上，呢間學校的確花咗好多時間精神去栽培個別小朋友嘅潛能！

恐龍媽蝦碌報學校

話說，一早打算報某男校，一早記低下載報名表一期！但大頭蝦媽媽竟然忘記咗！要到學校小一講座，有家長講起先上網睇睇~ 噢~過咗期！

但神奇嘅係，學校無將張表格清除，雖然過咗期，但仍經可以下載！

跟住落嚟，就係要print 所需文件，排隊入數，同埋交表！

因為恐龍爸响旺角工作，好多時交表嘅重任就落响佢身上，加上佢話自己去銀行唔駛排隊，咁我嘅責任就係提醒佢去入數啦~

點知~ 2pm收到佢嘅通知，佢唔得閒！

可憐嘅恐龍媽唯有响公司飛的去銀行，再飛的返公司！好在~阿頭唔响office！但係，當去到銀行時，老板個秘書打嚟，老板搵我！！！好好彩嘅係~ 咁啱老板忙緊，到佢再得閒，我已經上咗的士，電話一響就叫司機熄收音機！

平安過渡~

但恐龍爸公司隻鑊好似未搞掂，工作至零晨！雖然學校就响佢公司附近，但係~又要恐龍媽出馬，晨咁早去到排頭位！

想講，學校嘅保安好友善，面帶笑容，好有禮貌！相對之下，校工姨姨就真係…好唔友善！

話說學校將有蓋操場用作排隊之用，放咗好多圍欄，拉咗膠帶，而頭位嘅一邊有d大石，可以坐下。而呢位無聊嘅校工姨姨竟然行埋嚟，移動圍欄，令到大石變成响膠帶之外，咁我點坐呢？！佢係咪玩嘢呀！？

到差唔多9點，校工放咗50個家長上樓，問過應考語言，安排就坐，等等等~ 9:10先開始埋位交表對資料！！

最後，又打的返工！好彩準時到達！

 

報學校，先係浪費地球資源，再嚟就係浪費光音，仲有金錢，手上仲有4份表格要交，其中兩間學校仲要係得一日交表，諗起都覺得辛苦！

牛牛開學喇！！！

學校對N班嘅小朋友，實施漸進式適應週，由家長陪上堂，到家長坐課班一邊睇，然後第4日開始就要出班房，今日第五日，第一次要自己行入學校喇！

 

其實就算有家長陪，有d同學仔都會喊，但恐龍媽就第一日已經响下半場坐開少少 (實在太多人，迫唔到埋去，不如坐開啦！) ，到第二日工人姨姨陪牛牛，佢都無出事，第三日坐開，好多小朋友喊，第四日要出課室喇，小組有十個小朋友，得三個無喊！牛牛真係叻叻！估佢唔到！佢平時好嗲，少少嘢就喊定先架！

 

到今日，第五日喇，首先去送哥哥校車，然後由爸爸帶返學校，然後要自己行入去…

會點呢？哥哥當年都喊咗成個幾星期架！

結果~ 
牛牛無喊！嘩！牛牛真係叻叻喇！希望繼續到啦…

久咳

上個星期，恐龍爸感冒，好快傳染咗俾我，然後牛牛又有兩聲咳，哥哥轉頭又發燒，真係擔心開學點算！呢個適應週對牛牛好重要架嘛！

好喇~好彩兩隻嘢都無乜大礙，返到學喇！

但係我d咳就…唉~

 

之後睇過d中醫學書，我本身體質屬濕熱，最適應我嘅運動係做gym！因為可以响冷氣下流汗嘛！知係知~得始終要返工又要睇住兩隻仔，幾千個籍口！

終於，尋晚去咗睇一個街坊介紹嘅土產後生女醫師，據說，佢爸爸係老醫師嚟架！咁我去試試啦…. 佢竟然叫我做運動！佢話我好濕，做吓運動嘅話，咳都快d好！

咁好啦~今朝立定決心，送咗哥哥上校車就去做gym，仲買埋月票！呢次真係要乖乖地，順個便減番十磅八磅就好喇！

哈哈~

 

不過唔知有幾耐恆心呢…