人奶媽之路

首先.. 我唔係成功例子, 所以先想寫低我嘅經驗, 俾有緣人睇吓有無嘢學到~

恐龍媽無堅定嘅意志, 得樂意為孩子出多分力..  所以, 我無堅持過埋身餵

第一胎, 餓鬼恐龍一夠鐘就喊, 完全唔肯試啜, 成間餵奶房, 個個bb都靜靜食奶.. 唉~ 就咁就放棄咗埋身餵, 每日pump奶到3個月!

奶量好少~ 最多試過一日有10安, 後尾發現, 因為食得飯少! 因為恐龍仔分得出人奶嘅味~ 唔飲! 要mix奶粉, 所以無特別用心去增奶量, 只係每日飲魚湯..

租咗個電pump都用唔盡, 得嗰少少奶, 唔捨得用双pump!

就咁做咗3個月甜品..

 

第二胎, 一個合作嘅睡寶寶! 第2次見面 (仲係Day 0), 已經啜到20分鐘, 可惜.. 媽媽受傷了! 休息24小時, 小東西已經唔識啜!!! 唉~ 响医院.. 我已經上奶, 開始擠奶嘅日子..

之後再入院, 都繼續努力..

健康院姑娘話, 唔係咁易可以埋身餵返.. pump奶其實啱我多d~ 姑娘話: 雙pump, 一日7-8次, 唔駛按摩, 夠湯水, RELAX 係好緊要!

最後, 我加多個動作, pump完再擠清!

奶量慢慢.. 慢慢咁一日一日多, 啱啱夠俾1日食7餐嘅牛牛, 其中 5餐嘅奶奶, 另外半夜兩餐就開奶粉方便d (唔駛等暖奶嘛!) 就算想加奶.. 媽媽奶自己趕上, 每日就算pump 5或6次, 都係差唔多! (很奇妙~)

飲食方面: 每日一粒multi-vitamin (我成日覺得坐月食嘅嘢唔係balanced diet!), fish oil, lecithin, 湯水, 餐餐一大碗飯!

初期都有飲黑豆茶, 後尾都懶埋~

牛牛滿月時足10磅, 重得好好, 個半月已經見佢圓碌碌..

雖然唔係全人奶, 但係見佢捱過咗哥哥+媽媽+工人 長達4個星期嘅感冒接力, 再望住佢肥肥白白.. 好滿意喇!

就嚟要返工, 希望順順利利啦~ 真係唔知會點..

 

之前post過加奶嘅方法:  多d多d~ 媽媽奶