牛牛見親人講電話~就搶！
唔俾佢呢？
就發脾氣！
不停扭~好煩！
俾佢攞住呢，就唔停咁！然後~講外星話！
到底~你同邊個講電話呀？！
2011年8月31日星期三
儲印仔
最近，有朋友話，佢個仔扭買嘢，仲要係尋日扭完~ 阿媽話無錢買，今日見到，又再扭！呢個阿媽又再話無錢買！
個仔咁大，仲信唔信呢？！
唔想佢扭，做乜又去‘案發現場’ 呢？
其實，恐龍仔都會扭買嘢，但係除非我真係無帶錢，或者嗰樣嘢好貴(e.g. 買樓)，否則，我未試過話無錢買，我覺得無必要講d咁嘅大話！
咁，如果小朋友响街扭買嘢，點算呢？
哈哈~ 無良阿媽好多時會話爸爸唔鍾意、你屋企已經有喇！又或者，不如我地去買甜品食 (呢樣嘢，其實唔太好，但係對恐龍仔，絕對分散到注意力！)
如果係一樣合理嘅要求，我會話：不如你返屋企睇吓夠唔夠印仔換啦！如果唔夠印仔嘅，就要做d乜乜去攞多d乖乖豬印仔喇！
當然，如果唔多想佢買嘅，就唔再提起呢件事，仲要避免再去案發現場，提醒佢有樣嘢佢想要嘅！
如果想佢買嘅，就多d鼓勵佢做d正面嘅乖嘢，e.g. 好好自己食飯，要幫手攞購物袋，唔好爭玩具，要聽話…
然後，言出必行！
我唔敢講恐龍仔好乖唔扭計，但係佢係一個講道理嘅人，好多時如果佢扭計，只要平心靜氣同佢講道理 (加氹啦~)，佢會聽架！
不過，呢隻仔扭d唔响眼前嘅嘢多過眼前嘅嘢…可能，呢招仲高明，因為阿媽可能會俾d嘢安撫住佢先！
乖乖豬印，一個等於一蚊，要買貴d嘅嘢，要過時過節有爸爸批准先得！好似最近買嘅康樂棋，16蚊，買咗阿媽先問阿仔‘扣印仔得唔得呀？ ’阿仔好爽快咁答話‘好呀！’2011年8月30日星期二
跟記者會面
有日，有位記者响討論區留言，話因為睇見我响討論區嘅分享，想同恐龍媽傾吓小朋友興趣問題，佢做緊個關於小孩教育嘅資料搜集。
經過兩次電郵溝通，恐龍媽約咗呢位記者姐姐出嚟，因為恐龍媽要趕返屋企食晚飯，只能夠俾大約一個鐘嘅會面時間佢。
又係好似上次幫個讀教育嘅女仔做reaseach咁，越講越興奮！
中間，講起最近生果日報網站上，發佈咗一段短片，標題係兩歲七個月嘅小朋友，識得二千多個英文字！
其實，呢段片，恐龍媽都睇咗一小段，覺得個小朋友幾enjoy，無問題呀~原來，有d無睇到嘅嘢，佢阿媽好似只教英文，除咗學英文，佢無乜其他遊戲！
如果真係咁，就唔係幾好喇！
講真，小朋友學習，好睇佢地有無興趣 (家長點提起佢地嘅興趣！) ，無興趣嘅話，你想佢理你都難！既然呢位媽媽有辦法令妹妹肯坐定定玩呢個英文遊戲，咁佢好應該玩埋其他嘅遊戲！包括中文遊戲！
當初，點解恐龍媽會知道呢段片呢？係因為<買錯玩具教錯仔>嘅作者周碩响FB嘅分享，好多媽媽都話呢個阿媽怪獸，恐龍媽睇見好唔鍾意！點解個小朋友識字多就係家長變態呢？我唔認架！
面談時，恐龍媽多次提到蒙特梭利，其實我地只係某d嘢做到，但真係要成套做哂，响香港嘅環境真係難度甚高！
我地做到嘅，相信係尊重並回應小朋友嘅敏感期，多帶小朋友接觸大自然，俾佢地多d五感嘅刺激，唔玩電子玩具，少電視(好難做到零電視) ，小朋友工作時盡量唔騷撩佢地 (可惜哥哥最鍾意搶細佬嘅玩具！唉~)
教恐龍仔，大方向係培養閱讀興趣(能力) ，觀察能力！學音樂學游水，呢兩樣係生活上必需嘅，懂得欣賞生活環境，欣賞音樂，對佢嘅一生都有好處！學校~係另一方面嘅體驗，只要俾佢繼續好奇，唔會否定佢嘅問題，作出適當嘅回應，已經好夠！相信呢個小朋友已經會學到好多。
但當問到細仔，恐龍媽真係唔知點答！呢個仔同哥哥好唔同，唔可以用同一個方法，但係，如果蒙氏講嘅係真嘅，媽媽唯有繼續等，等呢隻小牛牛過口腔期，等兩兄弟懂得相處，留返d私人空間俾牛牛，咁~佢應該可以玩到教具，可以自行探索。英語環境就已經俾唔到牛牛架喇，因為我地大部份時間會同哥哥講廣東話，只係有時會成段對話都用英語 (試過恐龍仔打電話俾媽媽，一路講英語，咁媽媽照講，同事聽到，覺得好奇怪，仲問：乜你地屋企講英文架？！)
仲有，當天氣無咁熱，我地要行返晨運架喇！雖然無咗個天然松樹林，同埋超方便嘅韆鞦架，但係有返個有好多大樹嘅公園，算係咁啦…要好好珍惜呀！人類，應該由大自然陪住成長，而唔係電子玩意/電視！
2011年8月28日星期日
遇上康樂棋
忙碌的一天
呢日，因為恐龍爸要開工，無節目，於是恐龍媽一早就同恐龍仔去拍拖喇！
行行吓，唔見咗個人嘅？！
第一站，就係文化博物館。
入去之前，問咗恐龍仔要唔要睇持票展覽，會唔會買年票，方便去埋其他博物館，恐龍仔話：唔駛喇，我地去免費嗰度玩吓先啦…
的確，兒童探知館已經夠佢玩成日喇！
可能好耐無去過~ 呢個仔好似失咗憶咁，唔記得自己嚟過！
恐龍仔對呢度嘅陳列品~ 無乜興趣！
但係對巨型鬥獸棋同巨型飛行棋呢? 當然係唔願走啦！
玩咗一陣，轉戰.. 最好玩嘅.. 原來係…遊戲機！！！
之後，又同個國語媽媽玩咗陣康樂棋.. 似乎好鍾意咁喎！
玩咗個幾鐘，我地就出發去食午餐，怕晏d會多人嘛！路過一田樓下，見到chickeeduck減價，我地入咗去，買咗d衫仔俾兩兄弟。然後，繼續向ikea出發！
恐龍仔好想去玩，但係，要等兩個半鐘，真係唔掂！行咗一陣，睇咗d書枱椅，就走喇！呀~ 當然仲有食美味嘅雪糕啦！
返到屋企，已經差唔多3點，恐龍爸得閒，就輪到恐龍媽閉關..
兩父子去咗坐巴士呀！
黃昏時間，我地去咗探公公婆婆，仲買咗盒康樂棋俾恐龍仔呀！
不過~ 呢副康樂棋有d問題，就係無咗遊樂場，變咗恐龍仔至愛嘅rilakkuma!
2011年8月26日星期五
訂閱：
文章 (Atom)