~ 恐龍家 ~

2009年7月14日星期二

鬧情緒?

平時叫親恐龍仔落街晨運, 佢都係唔願落樓..跟住唔願返屋企!

今日, 恐龍媽隨意講咗句: 好啦~爸爸同媽咪落街街喇!

諗唔到, 恐龍仔答: 我又去!!!

哈哈~咁咪好囉, 唔駛拖拖拉拉啦!

入lift, 人仔話要去L1, 媽媽問點解要去L1呀? 佢答~去打韆鞦!

L2都去到打韆鞦架!

今日~又由一數到九十九, 中文! 數完都唔早喇, 要打道回府喇! 點知恐龍仔要去會所, 講咗幾次!之後又話要抱~ 媽咪慣咗"拖", 就話行到第三座先抱啦~

出奇地~好乖, 無再扭抱, 但係個樣有d唔開心, 呆呆地~ 到第三座喇, 都好似無乜心機咁.. 抱啦 (講過要算數架嘛!) 都係悶悶不樂咁! 去到大堂, 放返落地啦~對腳夾住唔放!!!

返到屋企都仲係唔多高興, 眼仔碌碌, 楚楚可憐咁樣 (十足佢病嗰個樣!) 唉!都係媽媽唔好, 傳染咗d傷風俾恐龍仔..

好在, 工人姨姨話, 恐龍仔之後肯玩肯食, 無問題喇!

咁~係咪即係嬲爸爸媽咪呢?

------

夜晚~ 恐龍媽陪恐龍仔玩~

恐龍仔又問起雞泡魚嘅英文.. 好啦, 問吓yahoo字典啦!

河豚 : blowfish, balloonfish~

於是, 興高彩烈咁又玩拼字.. BALLOONFISH~

然後問媽咪攞氣球玩~ 屋企無哂d普通氣球, 得返d奇怪形狀嘅... hmm.. 成條蟲蟲咁嘅~ 啱唔啱?

恐龍仔話好~ 仲要搵埋個氣pump出嚟!

出返廳pump波波, 手仔攪攪震, 叫佢唔好攪, 轉個頭又攪過!

終於~ 波波BOOB! 爆咗!

嚇咗媽媽一跳~ 嚇到小朋友喊~~~ 喊咗好幾分鐘!

媽媽抱抱啦~~~~ 坦白講, 真係未試過咁抱住恐龍仔抱咁耐! 好多時佢轉頭又要落地!

大家都好似好enjoy~~

不過~ 都要交功課嘅: BB俾波波bomb一聲嚇親呀? 媽咪都俾佢嚇咗一跳呀! 無事架~ 只不過係波波爆咗之嘛! 唔怕~ 媽咪都知道波波好易爆, 所以叫小朋友手仔唔好摸住囉! 怕如果個波波爆咗會整到BB, 好在波波無彈到BB咋! 好喇~ 無事喇! 你睇~ 波波分開咗幾份喇!

(重覆部份兩三次之後~~ 功課重點: 講吓發生咗咩事, 會有咩感覺, 媽媽明白, 有咩教訓, 然後點處理)

恐龍仔好勇敢咁自己執起個波波.. 放入垃圾埇!!!

2009年7月13日星期一

小事兩則

恐龍媽一早醒咗, 自已帶咗恐龍仔落街散步

行咗差唔多9個字, 一片草地旁邊, 恐龍仔有所"動作", 好似想shsh喎!

恐龍媽問: 係咪想shsh呀?

恐龍仔: no!

過咗幾秒.. 佢指住草地: shsh呢度!

吓?! 唔好喇嘛~~ 恐龍媽: 忍住忍住得唔得呀?

恐龍仔: no!

恐龍媽: 我地返屋企先shsh呀~ 忍住忍住!

恐龍仔: shsh呢度!

跟住自己除褲!!!

恐龍媽見四野無人.. 就隨得佢施肥啦~

呢次~ 係第一次! hmm... 點解佢識揀草地嘅呢?!

--------------------

返到屋企, 恐龍媽沖身然後換衫食早餐~ 今日早餐係豆奶+包包~

出到廳, 恐龍仔自己抱住隻杯飲緊橙汁, 食緊蛋糕仔, 見到媽咪包豆奶, 雙眼放光!

唔俾! 因為啱啱飲完橙汁!

呢隻嘢又唔扭喎, 只係爬上櫈, 伸長手"想要"咁樣 "wow-wow-wow"

唔俾得~

呢隻嘢竟然識放電?!?! 佢咪咪笑, 雙眼放住光咁望吓包豆奶, 望吓媽咪..

sorry, 都無!

為食貓~ 真係笑死人喇! 媽咪唯有極速飲埋包豆奶啦!

日出

日出~ 其實日日都見到.. 只不過係邊個階段..

呢幾日病咗, 日瞓夜瞓, 尋晚瞓得唔係幾好, 五點半~日出!

咁啱, 恐龍爸頂唔順張床, 去咗隔離房瞓, 於是..有機會影相!

屋企個窗都幾dirty..竟然focus咗落去~

其實出面係咁~

2009年7月11日星期六

用開口杯飲水

恐龍媽病咗兩日, 自我隔離中..

因為之前無預响屋企開歺, 所以又要入貨喇...

病住出去買嘢囉~ 無理由叫工人湊仔個仔出街買餸架?!

買埋早歺俾恐龍爸食.. 分咗d通粉俾恐龍仔.. 呢隻嘢今日算ok, 自己爬上highchair坐定定食, 突然唔要隻spoon, 話要飲湯湯喎~ 跟住自己雙手攞起隻碗.. 自己飲! 估佢唔到, 又真係飲到喎~~~

跟住, 到apple juice時間, 恐龍媽攞咗隻雙耳杯出嚟.. 半滿啦.. 見到裡面d汁汁搖嚟搖去, 都幾驚架! 不過都要俾佢試架! 又ok喎.. 細細啖~慢慢飲!

最後, 恐龍仔自己倒到成身濕哂, 都無話佢, 但係佢就唔停咁喊! 係因為媽媽話倒咗就無得飲?? 好啦~ 洗完白白出嚟再飲過啦!

--------------------

今日打風, 3号風球, 一時好天, 一時落大雨!!!

今晚, 又突然橫風橫風, 恐龍媽入房閂窗啦.. 恐龍仔跟埋入房, 媽媽突然興起, 不過熄燈睇雨咯?! 恐龍仔乖乖地陪住媽媽聽咗一陣雨聲.. 睇咗一陣雨境.. 跟住, 恐龍仔嫌廳嘅燈光影響佢, 叫媽咪閂門!

閂門後... 雨都差唔多停喇~ 我地竟然見到星星! 响黑雲之間.. 有好幾粒星星呀!

又過咗一陣, 恐龍仔終於叫媽咪開返d燈喇, 問佢鍾唔鍾意陪媽咪睇星星, 佢答: 唔~

有時~ 真係唔知响邊度學嘅, "唔"算係d咩答案呀?! 阿仔, 你唔係從此就咁對你阿媽呀?!?!?!?!

2009年7月8日星期三

月亮光光

落咗好多日雨.. 難得見到夏日嘅星空!

尋晚, 等到恐龍仔入房瞓, 我先發現天空嘅月光非常明亮! 可惜可惜~

半夜~ 月光照入房間, 好似有燈响屋外照入嚟咁, 好耐都未試! 仲有一粒好大好大嘅星星.. 恐龍爸話, 可能係太陽系嘅行星, 所以咁光!

今晚, 特意抱隻恐龍入房睇睇.. 見唔到月光, 但係就見到成天星星! 夏天難得一見!

到佢瞓咗.. 差唔多9pm, 月光先响山後爬出嚟! 由得條邊至全相... 快到大約一分鐘! 地球真係轉得好快...

星空都好快轉移.. 尋晚嗰粒大星星又出現喇!!!

恐龍爸仲話成日有經紀call佢.. 呢期真係升返好多.. 多到可以開價到接近一年前個價! (相差5%左右啦~) 搬唔搬? no喇! 我真係好鍾意呢間屋.. 話哂都叫做一見鍾情呀! 當年睇樓.. 睇哂十個八個示範單位, 個個我都搖哂頭, 唔係西斜, 厠所對正張床, 就係個窗對住公屋.. 行到最後一個示範單位.. 大門向正主人房門口! (扣分) 但係一入到主人房.. "別有洞天"四個字浮現腦海! 眼前係一片綠油油嘅山, 腳下係一片古老松樹林.. 遠眺係低密度住宅, 背後仲有海境! 將來亦完全唔會有其他樓擋住視野!

我呢個城市人入住初期, 周圍靜到耳鳴!!! 真係瞓响床就欣賞到星空 (當然只限一個方向.. 唔係360度啦!)

可惜.. 因為要起公路.. 松樹林無咗 (變咗一條行山小徑), 剩低嘅, 就係屋苑同公屋之間一行老松樹.. 所以, 恐龍仔好細個, 我就話: 呢個係樹林! 每朝我地就响呢小片樹林旁邊晨運喇~

每次講起呢度嘅自然環境.. 都唔想停!

2009年7月7日星期二

恐龍仔嘅玩具 (二)

係時候summerize番近期玩過d咩玩具喇! 上次係舊年九月BABY EXPO之後, 連新買嘅玩具都未識玩哂..

歲半開始嘅恐龍仔, 睇好多書, 識字~ 所以, 好多"玩具" 好難分清屬於教具定係玩具.. 呢度, 只會記低非"書"類物品~

首先揾到嘅~ 係

串珠仔好緊要架~ 有d KG會當interview題目! 係好好嘅專注力訓練!

下面呢set個其實同18mth嗰set差唔多.. 恐龍仔之後學識分顏色~

(蒙特梭利教具家庭裝 or 木玩~ 响淘寶買, 散裝嚟架~)

因為呢隻仔對唔同質感好敏感, 我地玩咗一排泥膠, 由驚驚玩到ok!

另外, 我地仲有個百寶盒, 放咗唔同質感嘅小導具 (e.g. 毛毛波, 勞作用鐵線etc) 都係玩到唔怕喇!

呢塊畫板都唔錯架! (泥膠/畫板 --> 斗斗城)

呢套都幾好玩架~

自由玩又得~

跟佢d模砌又得~

買呢間屋仔時~ 差唔多兩歲, 超鍾意! (on-line shop 訂嘅, 斗斗城有呢類嘢賣, 可以買埋隧道!)

好多朋友問起呢套feel & find响邊度有得賣.. 恐龍媽見過yahoo bid同babysky有.. 有興趣嘅, 可以自己search吓~

下面呢個~ 係嫲嫲買咗成年嘅.. 响ikea買, 訓練手眼協調~

呢套~ best buy from Taiwan! 係magnet嚟嘅, 有數字/顏色嘅元素, 加埋筆都係magnet~ 學用筆.. 幾好架!

仲有~無影過相嘅puzzle, 恐龍仔可以無需提示下拼到16塊~ d大人好多口, 所以唔多機會觀察到, 到底20塊拼到未~ (1盒4set唔同塊數拼圖, 吉豬島同千色都有, 約$20一盒)

其實都有玩積木, 不過恐龍仔鍾意破壞多過建設!

另外, 有銅片琴.. 同埋雅培近半年送嘅贈品 (天平 & 鋼琴)