整餅~

 

 

自從搬咗去新屋，又買焗爐，又學整餅，雖然唔算好成功，起碼有個忠實粉絲！ (無錯~係一個！因為牛牛乜都唔食！)

 

呢排，俾團購嘅靚靚cake pop同macaron吸引住！好想學整，然後响生日會整俾小朋友食！

 

今次，學cake pop，好成功，唔太難，但無人教嘅話，唔係咁易搞！

最難得嘅係~ 平時唔食我整嘅嘢嘅牛二少，都咬咗兩啖咁多！

坪輋遊

年初五，有乜嘢做好呢？
不如去摘梳啤BB？ (按：牛牛嘅BB話~)

於是，我地約咗啱啱响加國返港嘅老表，向坪輋出發！
點解揀坪輋？因為我地住東鐵沿線，唔想去元朗嗰頭，見粉嶺站有小巴去坪輋，20分鐘就到，幾方便咁！

去到雲泉仙館，後門有好多小攤檔，賣乾果之類小食，小朋友就不停咁試食！

本來做哂資料搜集，但去到見到我地要揾嘅農莊嘅海報，但不見入口！於是去咗隔離老徐問，見任行，依重量收費，於是就帶住四個小朋友入去喇！

首先，大表哥拖實表妹落田！

拔蘿蔔！
牛牛都唔執輸，影番張相！

小朋友好快就俾士多啤梨嘅香味吸引住，唔捨得離開士多啤梨田喇！

BK有jm話~元朗有d場初三已經無乜嘢摘，但呢度真係好好咁喎！
我地見到好多熟嘅果實，仲見到有3-4粒正常size咁大嘅giant 梳啤BB！


呢籃就係我地嘅收獲喇！仲有一大堆士多啤梨同埋兩盆士多啤梨苗！承惠二佰大元！

之後，我地去咗雲泉仙館午餐，但呢4個小朋友，只得大表哥一個肯食嘢，其餘三個唔多願食！浪費！
恐龍媽就覺得幾OK喇！

行大運

年初四，行大運

 

今年，恐龍媽工司初九先開工，但恐龍爸就初四開工，多咗幾日假，帶啲細路去邊好呢？！

 

一早，婆婆打嚟問孫：要唔要去香港公園同表弟玩呀？

點知恐龍仔話：要同媽咪去行山！

 

我早一晚同佢講好，聽話就有得去行山，而佢竟然鍾意行山多過同表弟玩？！真係有啲意外！

 

呢日上午，有朋友仔過嚟玩，一齊包餃子午飯後，我地兩母子就向大埔窖出發！呢段家樂徑只有1公里，應該唔難，最最重要嘅係~有車到！唔駛轉車！

 

去到，好易搵，但估唔到感覺上超過一半係樓梯級！都咪話唔辛苦！

 

最後，真係好似網上資料咁講，要用一個鐘先完成到！當中當然句括行下停下睇嘢啦~

 

走時，沿車路離開，沿路有幾棵楓樹，相信秋冬時樹葉轉紅，應該幾靚~~

年初三@林村許願樹

年初三，唔駛去拜年，咁去邊玩好呢？！
恐龍媽8到許願樹有嘢睇、有嘢食，仲有特別交通安排，於是等恐龍爸起身，我地就一行買人北上！

大路入小路~ 塞車！睇嚟好多人好似我地咁...

去到，莫名其妙地，見到好多新年花車！

之後行去小灘檔度買嘢食！首先當然係細路必食嘅麥芽糖夾餅啦... 你睇呢兩兄弟幾興奮！大嗰個正研究點樣將塊餅攞出嚟！



最後，牛牛係食到唔停口！兩隻為食貓！
之後仲有豆腐花~~

食完，行出去就係許願樹真身，再轉入會場~就見到替身許願樹~

實在太多人，我地行咗一個鐘左右就走人喇！

蛇年進步

恐龍家祝大家~

2013台中日月潭二人世界HEA爆之旅

呢次點解去台中？因為有人報咗環島單車團，台中解隊

點解係二人世界？因為有人想二人世界好耐…佢老婆數數日子.. 噢~有人生日！於是問準大少，放人4日陪佢老豆過生日！

 

編行程時諗咗好耐：日月潭定係阿里山？

最後放棄阿里山，因為比較遠，車程耐，而且登山火車地震後都未通番車，不如留番遲啲啦！

 

出發前，上金石堂入貨！

 

<起程 - 台中>

晚上八點幾嘅夜機

幸得好工人幫手，我六點前就出發去機場，去到未見到登機閘口號碼，過咗關見到一眼，轉頭又無閘口號碼，無無聊聊唔知去邊好，食咗個吉列豬餐，sms機場返工個老朋友，問佢班機搞乜！因為佢咁啱放食飯，仲”出嚟” 陪我一陣，用staff price請我飲咗杯M Café 豆奶綠茶，送埋我到鬧口！佢無無聊聊未有車返去，仲响閘口報告有6個大陸客遲到，搞到班機要遲開！(好朋友唔駛多，隨傳隨到嘅…就得呢個！多謝你呀！)

到達台中..

估唔到個機場咁細，係好大好遠嘅跑道，但大樓就細到…. 得3個閘口，一入到去間房就係海關，出去就係行李帶，行多幾步就出到大堂，右面大門一出就係馬路！10分鐘後已經响的士！

 

DAY 1 : 誠品，逢甲夜市

恐龍爸有朋友同佢一齊單車遊，阿朋友呢日黃昏機，於是一齊Hea…去到美術館…點知休館！無無聊聊行咗去誠品，發現一間幾好嘅日式火鍋店(@B1 - 勤美誠品) ，仲有一間個樣好PRO嘅麵包店(@B1 - 勤美誠品)，買咗我好鍾意食嘅麻薯，連唔多鍾意食麻薯嘅恐龍爸都話yummy! 我地決定臨走前再嚟入貨！食飽~ 响誠品hea~

hea飽，行去坐公車去逢甲，呢個夜市真係好大，我地邊食邊行，行咗一個大圈就坐公車返台中火車站，攞書，返酒店

咁就一日，好HEA~~~

 

DAY 2 : 日月潭、九族文化村

大約十點坐仁友車出發去日月潭，其實一早check過，應該問” 台灣好行” 套票最抵，NT990包來回台中車票、九族入場票、遊湖船票、環湖車票、單車優惠卷等，但係睇見南投車要兩個幾鐘先到，而仁友就唔駛兩個鐘，NT9xx得來回車+九族票都殺！(不過~之後先知要即日來回，蠢咗！)

11點幾就到日月潭，放低行李，攞住民宿送嘅船票出發！首先就係去依達邵醫肚！我地去咗旅遊書講嘅一間小店食總統魚套餐(NT900) ，我就覺得幾好喇，不過恐龍爸話一般，最重要嘅係：我地都係懶人，唔多鍾意食咁多骨絲嘅淡水魚！

坐纜車上九族，對一個有啲怕高嘅我…. 唔係一個幾悅快嘅旅遊節目！上到九族~又幾新鮮喎！好啱我地呢啲想hea嘅人！哈哈~

之後，見時間尚早，過返河，然後行去涵碧樓食一餐貴啲嘅晚餐！(個境真係好靚呀！)

DAY 3: 集集、水里蛇窯

買咗” 台灣好行” 車埕套票 (NT300) ，一心去車埕+蛇窯，但又想去集集，於是，去咗最遠嘅集集，行吓軍史公園，明新書院，再返火車站旁嘅紙箱王午餐。逗留時間有成兩三個鐘，原因只係火車班次唔多，而公車都係，所以，最後我地放棄車埕，直接去水里蛇窯玩泥！

作目~應該要兩三個月先到香港，耐心等待…

晚餐，隨便食咗個合菜(有飯有餸有湯嘅套餐)，然後返民宿切蛋糕 (預先叫民宿代買嘅！)

 

DAY 4 : 台中hea~

一早，睇日出！

九點幾食咗民宿個豐富早餐，就起程返台中喇！然後飛的去誠品，放低行李，又再食日式火鍋！再買一輪手信，放好，再hea誠品！hea到無聊，又去春水堂hea過，

到4點鐘，真係要走喇，飛的去機場，由誠品到機場，check-in，過行李，過海關，到候機室，睇一睇表:5pm！仲有大半個鐘先入閘！

入閘無幾耐.. 飛機就關門，因為齊人，我地响預定飛嘅時間，已經响跑道中間喇！

但到咗香港，又要等位，又要埋位…. 開始有啲討厭大機場！都係細機場好啲！

 

返到屋企9點正，兩隻小豬已經熟睡！

ZzzzzzZzZzzzzz

 

 

 

 

Party time

唔知係媽媽唔夠social，定係阿仔自己唔多social，恐龍仔甚少收到生日會邀請，一年都係得一兩次，上年琳琳生日會係爸爸帶去，今年就輪到媽媽帶，睇見~

原來幾普通嘅party food，對小朋友而言，都係美食！個個好似放監咁！

仲有，原來校車係好好交朋友嘅地方，恐龍仔今年嘅好朋友都係坐同一架校車！仲要係同班同學！

最令媽媽感動嘅係，一路以為恐龍仔唔太熱心搶答問題(老師講嘅) ，唔多鍾意群體活動，但原來…佢係會舉手搶住出去做代表，去參與群體活動架！

今日，小朋友分成兩隊，恐龍仔排得較前，當活動要求一位冷靜嘅小朋友，小隊長揀咗恐龍仔，原來呢個係忍笑遊戲！愛笑嘅恐龍仔竟然忍到笑！另一個遊戲係要小朋友唱歌，又俾佢搶到個咪，大唱學校教嘅歌仔！

原來恐龍仔都鍾意企响人群中間，受人注目！