古怪恐龍

有古怪牛~ 當然仲有個古怪恐龍哥哥啦！

呢隻嘢~ 無乜邊次會正正經經俾媽媽影張相架喎！

見佢個豬咀咁可愛，咁想影吓囉，點知~ 即刻變咗咁喇！

豬咀啦！

經過媽媽嘅堅持底下，終於聽話喇！

不過好快又變咗咁！

呢排嘅最愛：Thomas火車玩具！
多謝軒軒同學呀！

當然仲有爸爸送嘅Lego大貨車啦！ 恐龍仔已經玩到出神入化，唔知佢砌乜喇！

arms up!

呢晚，媽媽放工見到一隻開心牛，同佢玩點蟲蟲，佢唔停咁哈哈笑！

笑到，媽媽終於忍唔住要攞相機出嚟同佢影相！但係~ 一邊玩住點蟲蟲~又點影到相呢？

連牛牛都R哂頭喇！

牛牛每次見親相機，都有d失控架！

想避開佢，唔係咁易，佢最叻就係扭計！
就係咁樣~抱住媽媽對腳狂喊！

呢次都影唔到佢扭到喊哂個衰樣呀！笑c人！

襯媽媽同哥哥食飯，牛牛同Auntie玩... 玩玩吓，媽媽聽見有人仔講：ARM~UP!
嘩！不得了呀！牛牛~ 你講嘢呀？！？！

佢UP完就自己拍掌仔，好開心咁笑！係人見到都都開心啦！

轉下眼，有人爬上鋼琴偷嘢！牛呀~ 你識企穩喇？！

差唔多夠鐘上床喇，呢隻嘢換完衫爬咗出廳八掛！大家留意吓佢嘅姿勢！

佢一隻腳係正常地用膝頭爬嘅，但另一邊就有腳仔！膝頭唔落地架！佢一直都係咁爬... 仲爬得好快！次次上playgroup要爬隧道，都難唔到佢架！

最後，加送牛牛抱住樽奶就飽，唔駛飲落肚個樣！晚晚佢都係咁！一見奶樽就發狂！一放入口就happy.. 飲唔到都無問題架喎！

牛牛的動物園

恐龍家有個Miffy動物園，裡面有好多可愛嘅小動物

最近，呢個動物園嚟咗一隻好大好大嘅動物呀！

佢就係牛牛喇！你睇~ 好肯定d小動物怕咗佢囉！

牛牛嘅鬼祟樣！好可愛呀！

垃圾埇？

牛牛，係一隻乜都放入口嘅小動物！
尋日，爸爸喺屋企，發現playpen上面有一堆波波殘骸，牛牛應該當個波波係蘋果咁咬！

(食緊飛機)
好恐怖！

仲未講~ 屋企有隻sugar rabbit個咀... 甩哂線！相信有d人仔想親親rabbit個咀！

每晚大約六點，牛牛就開餐！佢自己嘅食物~佢未必會食完！食食吓總係會擰哂頭！有時俾件玩具佢玩吓，可能食多幾啖啦！

但係到哥哥食晚餐，佢又會食埋一份！

到差唔多8點，爸媽食飯，又唔少得牛牛呢隻為食貓！佢總係爬到媽媽身邊，以渴望嘅眼神話俾媽媽聽~ 佢又要呀！

今晚，媽媽食食吓，發現唔見咗隻貓... 於是大聲話：牛牛~過嚟媽媽度~有飯食呀！

然後，聽見急促嘅爬行聲，一隻爬牛牛就爬到媽媽身邊，努力地站穩...張開大口~等食！


牛牛呀~ 你好可愛呀！

但係媽媽唔係好明：點解你呢幾個月都無重過，依然得21磅？！

今朝，仲俾媽媽拍下呢兩張靚女相！

敏感的第9日

啱啱同恐龍仔睇完醫生，醫生都係話敏感，好似濕疹咁！

個傻仔d疹由上臂生到手掌喇！上面好番又到下面痕！慘慘！

希望佢快d好啦~ 睇見佢瞓唔到就慘 (包括嘈醒埋爸媽！) 今日去睇醫生，仲有一個目的，就係去攞定醫生紙，唔想返到學校唔俾上堂！

唉~

忙~忙~忙~

點解呢排無乜update?

因為實在太忙！又無乜特別事發生，就算有~ 轉吓眼就唔記得咗！

恐龍家終於揾到短租屋，仲要係新屋附近！太開心喇！恐龍爸忙買賣樓，租屋就到恐龍媽去煩，聽咗兩三日經紀不停來電，終於俾個經紀揾到個唔至在嘅業主，佢不但肯7月中先起租，仲有兩個星期嘅免租期！仲會幫我都做埋窗簾軌同埋燈飾！咩人嚟架？咪就係大陸人囉！如果係香港人，一嚟唔會咁快肯同你簽短租，二嚟怕d細路整花佢間屋！但呢個業主真係乜都無問！真係唔該哂！

當然，仲要唔該個好幫得手嘅經紀啦！約好哂時間，臨門都有個經紀走出嚟搶單，我都本身offer俾埋業主佣金，點知隔離offer半佣！嗰度都唔少錢架！最後，原本個經紀自動改半佣，咁我地當然俾番佢做啦！雖然見佢有d唔開心，最多遲d請佢飲茶啦！

暫時，所有嘢都好順利，恐龍媽努力計劃點搬，搬乜，點放d什物傢俬，有乜要買…

希望跟住落嚟繼續順順利利啦！

敏感？

星期日去完海星灣，我地直落BBQ，因為恐龍仔嗰兩日咳，都擔心係咪唔去得！但出去之前，佢又好似OK，同恐龍爸講好，去完睇海星，如果情況不妙，就早走啦~

咁...

玩完海星，佢又好似仲得喎，我地繼續...

一齊都仲OK，只係~ 恐龍仔開始有d攰，泥涌好多蚊呀~ 我地叫咗恐龍仔坐近火爐。突然，有隻毛蟲走咗上恐龍仔條褲上面，嚇餐佢，恐龍仔大打一拍~

之後，如常發呆，無乜點食嘢，再同小朋友玩咗一陣，我地就返屋企喇！實在太多蚊，恐龍仔已經咬到成腳都係！

牛牛呢？無事！

返到屋企仲涼，都未發覺有乜唔對路，直至半夜，隻恐龍咳醒+懶咗尿 (醜c鬼！)，幫佢換床單之後，佢不停R，睇真d，先知大髀好多小粒粒！佢仲有R頸！

3點幾，佢再無再瞓過，可憐嘅恐龍媽抱咗牛牛幾個鐘，對手太痛，成晚都瞓唔到，到4點無咁痛，加上俾恐龍仔趕走，先瞓到兩個鐘...

一早~ 發現恐龍仔條頸腫哂！右手同右腳好多粒粒，左邊唔多，身無！

見佢咁慘，忍到醫生開門，我地去睇醫生，醫生話佢應該係敏感喎~

我地估係嗰隻毛蟲啦~

可憐豬，靠食住d西藥先瞓到！

今朝見佢... 大達咗！下巴都腫埋！生到手掌手背都有！！！

媽媽好心痛呀！