拍掌仔

牛牛識得拍掌仔喇!!!

呢隻牛可能有成20磅, 每個星期湊佢一日, 都已經搞到佢老媽子手臂酸痛!

雖然有個差唔多時候出世嘅哥哥, 但係發覺牛牛著嘅9成係新衫! 好多6-9mth 嘅冬天衫已經好緊! 又~成日响屋企好少去街街, 所以著夾衣多~ 好少著衫褲! 搞到有d買落咗嘅褲~ 完全無著過!!!  唉~

大隻牛呀~

半夜咳醒~

恐龍仔搬咗床瞓幾晚~ 晚晚咳醒喊, 有時仲嘔!

尋晚爸爸攞咗個奶樽消毒器嚟放濕.. 又好似幾好喎~ 於是媽媽今日放工飛去買啦~ 點知周圍都係得凍蒸氣嘅, 因果天氣凍, 暖機賣哂!!!

揾咗兩間電器舖, 都無~ 唯有買個冷暖兩用嘅~ 貴兩百大元!

雖然俾人話富貴~ 但係見到恐龍仔無再咳~ 乜都抵返啦!

 

牛牛@8 months

其實牛牛已經過咗8個月好幾日, 但係一路忙住其他嘢, 無update~

牛牛呢個星期開始食粥仔喇! 之前一路食糊, 我試過俾唔同嘅糊佢食, 佢照單全收! 另因為牛牛有輕微濕疹, 好似係蕃茄問題.. 所以一路加入新食物嘅進度較慢! 上星期食蛋黃喇, 今個星期先開始食肉~

呢兩個星期, 牛牛超多嘢講! 好大聲添! 成日好似鬧人 / 有嘢要投訴咁! 笑c人!

上個星期開始, 坐得好定喇! 唔駛人扶, 仲想扶住嘢起身添! 有時瞓低咗, 會想自己起返身 (sit-up!!!) 佢個樣好搞笑!

尋晚睇住佢.. 拍哂枱!  媽媽同佢講:" 乜你唔痛架咩? " 佢望吓自己對手, 又拍兩吓, 然後又望吓對手, 好似聽得明人地講乜咁... 唔阻你做實驗喇!

牛牛未出牙呀! 不過好似見到牙肉有少少裂開咁.. 期待~

體重.. 呢排著得衫多, 大約19磅啦, 好似無乜太大進展咁~ 無計! 鬼叫佢唔願飲奶呀!

減產中嘅媽媽奶.. 都仲夠俾細食牛牛兩餐! 不過呢隻嘢好怪, 半夜飲到6安奶, 但係日頭就飲得2-3安!

牛牛依然好鍾意媽媽隻手! 繼之前鍾意欣賞完d手指再放入口, 呢期就轉咗唔欣賞喇.. 直接錫錫媽媽手背!  好sweet呀!  真係簡單直接嘅... 所以媽媽返屋企第一件事除咗同兩個甜心打招呼之外, 就係第一時間洗手! 牛牛就會搶先捉住媽媽隻手-->放入口! 快到你唔信!

 

不得了~ 有人想嫁俾恐龍仔呀!!!

哈哈~哈~哈~

恐龍媽知道自己有d傻.. 不過, 第一次聽到有人想同阿仔結婚, 真係覺得好好笑~

個妹妹係恐龍仔同班同組嘅小女孩, 今日同佢媽媽傾轉唔轉校好時.. 佢自己提起嘅~ 今晚返去訪問吓當事人先~

仔呀~ 都知你迷倒好多成年女性生物, 估唔到連小妹妹都走唔甩..

wahahahahahah~

無覺好瞓

牛牛近來瞓覺無之前咁快, 有時都要搞成半個鐘!

尋晚都係! 搞掂隻牛, 又要同哥哥沖涼, 點知阿牛又醒返!!!

講完故事, 工人返到-->甩身!

又去侍候二少! 攰死咗! 瞓啦.. 點知恐龍爸入嚟搵嘢, 著咗枱燈唔熄~ 多謝哂.. 醒咗瞓唔返!!!!

未夠12點, 牛牛喊.. 唔停! 怕嘈醒哥哥, 起身睇睇.. 開奶> 繼續瞓..

大約點半, 恐龍仔走咗入嚟!!! 我叫佢上嚟一齊瞓 (第一次!) 但係佢似乎唔多鍾意我個pillow, 亦唔鍾意我張被! 不停咁轉~ 瞓著又醒返!! 我頂唔順, 起身啦.. 佢跟住我.. 然後上返之前瞓緊張床... 但係仲想我陪.. ok啦..

但係都仲係唔停咁轉.. 因為我一定要佢冚被!

最後, 佢話: 媽咪~你走啦!

多謝哂!

但係.. 仲未完! 4點, 大少大叫: Auntie, I want 99 please!

工人無理佢 (人地睇住牛牛已經成晚起身~) 我過去同佢講.. 無奶奶架!

然後返床繼續瞓!

好在~ 都瞓到恐龍爸個鬧鐘響!

無命!!!

希望恐龍仔快d適應佢個新Dino Den啦! 今時睇吓佢想唔想搬埋其他雜物過去..

加油呀!!!

 

告別瞓咗3年嘅Dino Den

講咗好幾次, 試探恐龍仔可願意去隔離間房瞓..

唔似佢瞓開嘅上下格"丁"字床, 隔離房無床欄, 只係一套大人瞓嘅子母床!

牛牛出世之後, 我地開咗張網床放咗入去, 陪瞓嘅就瞓子母床囉~

因為講過幾次, 恐龍仔都無乜反應, 我地唔想迫佢, 但係牛牛就嚟識爬, 唔可以再瞓網床上格喇! 所以~ 其實已經買咗床墊(下格子母床係無床墊架), 準備好床欄, 諗住牛牛瞓上面, 工人瞓下格啦..

點知恐龍仔今日突然話要响嗰邊瞓! 仲自己親手搬佢d朋友仔過去一齊覺覺添!

黃昏~ 媽媽問佢: 今晚仲想唔想响度瞓呀?

佢話好呀!

為免有人中途玩嘢.. 於是, 早d瞓嘅牛牛瞓住爸媽張大床, 恐龍仔真係去子母床度瞓 (但係我地未安床欄!!!) 瞓咗~ 再搬牛牛去哥哥張床度~

第一日~ 成功!

 

唔經唔覺~ 恐龍仔返咗屋企啱啱3年喇, 工人姨姨都嚟咗3年! 依家~ 輪到牛牛瞓兒童床喇!!!

X'mas Party 2010

聖誕節, 學校有個party, 小朋友們要上台表演..

其實舊年去過一次已經"夠哂", 但係如果一班大部份小朋友都要表演, 要受訓, 咁得一兩個無份..又好慘嘅~

所以, 就算覺得貴~唔抵, 都係要去!

响屋企欣賞過好多次喇.. 好純熟! 但係上到台又係另一回事!

老師帶緊"走位"

個傻豬上到台起勢揾爸媽.. 望完一大輪, 揾到喇, 先記得要表演!

都叫做有郁吓嘅~

扭吓腰..

舉起手仔..

知道有人影佢.. 成日作怪!

每位小朋友都有一份小禮物.. 恐龍仔好鍾意呢對"眼鏡"呀!