家長網絡小組

早兩個星期去咗做評估，做完下午就講結果。
感受好大~ 但最重要嘅係有結果，我地就去搵支援！

仲有，又開始我新一輪小學研究，問咗好幾個名校用家，答案係：(1)校長話全校都係精英，一視同仁！(2)無架喎~
最重要嘅係，大家嘅包容度都偏低！好彩恐龍仔嘅問題唔算大~ 但足夠教育心理學家見完家長之後，覺得需要同班主任傾下！

講番家長小組，呢個係家長尋求心靈上支援嘅地方，心靈大於實際幫助！因為我見到嘅，係其他人問題比我更大，心存感恩！
睇到導師分享嘅片斷，令我地小心留神：原本小朋友會咁樣諗嘢~
導師強調：佢地個腦同我地唔同！
即係家長要接受家有異類~  需要加倍耐性！

我努力緊！特別係當隻恐龍發惡想打人時，要有耐性，唔好發惡！
當佢硬頸時，唔好同佢講多餘嘅嘢！只講家長嘅要求，唔好答佢d"點解？！"

恐龍爸話，無乜用，嗰個依然係佢個仔，佢都係會一樣咁教！

呢個仔就依然會一樣咁蝦我！
佢話：媽咪，我好想聽你話架！但唔知點解我做唔到呀！
佢個樣真係有d苦惱架~~~