棋會聯賽2013第3回合上半場

 

呢個比賽對於恐龍媽有d特別意義，第一回合下半場係恐龍仔第一次响老師建議下參加比賽，當時佢學咗圍棋只係短短4個月，跟同佢一班嘅女同學，再加一個小三嘅師兄一隊，3局兩勝！已足夠响該回合唔駛包尾 (當6局兩勝)

 

第二回合，俾呢幾個初哥贏咗初級組亞軍，冠軍隊有兩位兄弟，成年人。

 

今日第三回合上半場，由恐龍爸帶仔出賽，今次恐龍仔唔再係副將，第一次做主將！第一局已經係硬仗，好辛苦贏咗，第二局就對嗰兩兄弟，因為棋力差異，對方讓5子，恐龍仔勝！

最終，恐龍仔同女同學都3局勝，即係佢地嗰隊上半場全勝，好大希望攞呢個回合嘅冠軍！14號繼續努力！