勇敢好孩子獎

恐龍仔腳仔又痛又痕，一早叫佢起身，佢猛話唔想返學！
媽媽又點會放過懶人呢？！雖然，都明白腳痛好慘，但係校車出入，應該都無乜路要行啦...

返學~係小朋友嘅責任，我地唔可以因為少少痛 (恐龍仔：係好痛呀！)就唔返學架！
於是，媽媽同恐龍仔講：如果你能夠克服困難，唔怕痛楚，媽媽就獎你一個勇敢獎啦！

可惜，媽媽工作近來較忙，無時間整，到返工先諗起！急忙之下，返到屋企高速完成！

好孩子，繼續努力呀！

父母如何訓練子女主動學習，配合子女成就

恐龍媽呢日，入咗屯門聽理盧幼慈教授嘅講座。

講者首先講吓佢個主題:
首先，家長要諗吓，你想子女有乜成就，重點在於配合，只要家長講啱嘢嘅話，小朋友就自然會主動學習架喇~

講者講咗個例子：有位單親媽媽，供咗兩個子女出國留學，但係細仔用咗7年多都未大學畢業，學校話：從未有中國學生要用咁長時間完成個學位嘅！
到底~呢個阿媽講錯咗d乜呢？
講者話：佢同個仔講~你畢咗業就要還錢俾阿媽
於是，個仔一路拖住唔畢業喇！
咁點收科呢？講者教嗰位媽媽：同個仔講，你再唔畢業嘅，就要還埋利息，一年後x厘，兩年後又多d...
最後，呢位公子响下一個學期就畢到業喇！

另外，有一個重點係：唔好俾小朋友咁安逸！
由三歲起，要多多俾佢地勞動，做吓家務：做功課溫習，係左腦活動，做得咁辛苦，就要俾左腦休息吓，叫右腦去洗吓碗抹吓地咁~
要同小朋友講：讀好書，係佢地嘅責任~ (做家務都係)

仲有一個管教重點：唔可以講"唔"字！
即係，佢跑，唔係講"唔好跑"，而係"慢慢行 or 你同我行！"
如果佢隻腳踢人，唔係都佢"唔好踢人"，而係教佢：腳係用嚟行同埋企 (然後罰佢行 or 企)

仲有，賞罰~ 可以用Smiley System   (呢會website我隨便search返嚟架咋~)

聽Norma嘅講座，有樣好，就係唔悶！雖然，聽完好似唔係幾貼題，但係都有d得著！
仲有~ Sam Sir講嘢嘅語氣，有d都學得好足！哈哈~

場內有一份單張，係一大堆CD/DVD，由青田代理嘅: 可以上佢地個網頁揾吓：

主頁 » 商品目錄 » 多媒體教材

可憐豬

恐龍仔尋日開開心心返學，但到10點幾，恐龍爸收到電話：阿仔高燒中
又係唔知乜事，只燒，無其他問題！
考起醫生，開咗d勁退燒藥同埋開定d咳藥水俾佢..

跟住，佢就不停瞓.. 瞓到黃昏時份，無燒喇，個人仲好精神，咁當然就唔肯瞓覺啦！俾佢夜少少瞓，又OK，可惜半夜牛牛大喊...
於是，恐龍仔就瞓唔番，仲久唔久叫人陪佢玩！

仔呀~ 你開燈睇書都算喇！就唔好嘈醒其他人先得架！
6am~ 俾恐龍爸鬧到佢瞓番！

pm，同恐龍仔去街街，佢話腦仔痛喎，仲不停R！唔知有乜嘢咬佢，兩隻腳板又紅又腫！陰功~

仔呀~ 媽媽知道一定唔好受架喇！希望你快d好番啦~

ART JAM

响團購網見過ART JAM好多次，一路都唔明有乜咁好玩，而且見過嗰間响中環，無乜嘢都唔想過海！
直至，有媽媽朋友話佢公司搞咗個員工親子活動，雖然都係要過海，但係算啦，同幾個小朋友一齊好玩好多！

呢度有個大窗，對正維園，幾正架！
首先，恐龍仔叫媽媽油藍色做底色，佢自己就用黃色

然後，媽媽用白色畫咗D嘢，恐龍仔就叫媽媽用橙色畫個咁樣咁樣(努力比畫ing)嘅咀，同埋L鼻(指定要咁嘅方向)，同埋呢對眼！

跟住，可能嫌媽媽手腳慢，佢自己攞起畫筆，畫咗耳仔、耳環，同頸鏈！然後，媽媽唔敢再俾佢搞破壞，因為另一邊箱，佢自己嗰張....

由橙色嘅魚，有海草，有bubbles...

變成，有個網網住咗條魚，再有加潛水艇經過...

跟住仲要寫字！


好喇，再唔收工，就會開始搞破壞架喇！同場已經有小朋友响度玩到兩隻手都係顏料喇！
恐龍仔堅持要自己攞哂...呢兩張畫，將會响佢間新房長期展出！

牛牛@動身又動腦

星期六一早，見到個美人响廳玩


好快，我地就去到佐敦上堂，今日玩嘅，係爬牛牛！

同埋，牛牛好似唔多鍾意嘅fitball！

做乜你個樣咁慘架？

又係爸？！

話說，牛牛開始跟人口水尾學講嘢。
呢晚，爸爸幫哥哥練習學校嘅歌仔，準備下星期一嘅評估，因為上次媽媽同牛牛入房玩，令到小氣鬼坐唔定無心機溫書，於是，今晚媽媽唯有响廳玩啦。

媽媽同牛牛講：媽媽
牛牛：爸
媽媽：媽媽
牛牛：爸爸
媽媽：媽媽媽媽媽~
牛牛：阿爸！

媽媽開始無耐性喇！
媽媽：牛牛，係媽呀！
牛牛：阿爸！

於是，媽媽指住爸爸：爸爸
牛牛望住爸爸講：阿爸！
爸爸聽到，就當然開心啦！但係，到底呢隻牛係點運作嘅呢？！

當媽媽要放牽嘅時候，牛牛：唔~媽！
雖然，唔媽=飛吻，不過總好過無啦！

活動小手

一路無乜機會同牛牛玩教具，因為哥哥唔會錯過呢d機會，一定會搶！
呢晚，哥哥忙食飯，牛牛終於可以靜靜地~ 自己玩一陣！

其實媽媽嘅點子又邊會咁少呢！只係苦無機會！
呢張相係應該上星星期影嘅，媽媽放咗d coins去牛牛隻腳趾仔度，跟住，佢自己又有樣學樣~

咁又玩一大餐！

哈哈~咁先似恐龍仔個細佬架嘛！

牛牛的BA

牛牛呢幾日心情幾好，開始識唱：I~A~I~A~O~
見佢可以發到咁複雜嘅音，就自然加多幾錢肉緊講嘢啦！
呢兩日，佢識講多咗嘢喇！

包括：BA!

牛爸就當然開心啦，因為呢個BA嘅係發個音咁簡單，係真係叫佢架！

但我呢個媽~就唔知幾時.. 先有人.. MA我喇！

牛牛@動身又動腦

媽媽好少幫牛牛影playgroup嘅上堂情況，因為... 唔係要看住哥哥，就係媽媽單拖帶住牛牛，有時兩個帶一個都懶得攞相機，所以...

不過難得呢排媽媽經常帶備相機，就影影佢啦！

來開始之前，牛牛攞住兩個波波fing！玩到好high！

呢個，係UP！當時，Sam Sir點緊名，之不過呢~ 叫牛牛個名時，佢無反應，到叫其他小朋友個名時，佢就舉手！

呢日，上咗一半，牛牛就開始扭計，好似想瞓想食咁！最後，玩佢最叻嘅swing swing, 佢都係喊住做！好彩到第二次時，佢冷靜咗少少，上到去，仲靜哂，一邊fing緊，一邊好似想笑咁！

唔經唔覺，由牛牛唔夠12個月，上呢個playgroup上到牛牛足18個月喇！希望見到牛牛多d進步啦~

80分鐘環遊世界

 

 

"有沒有想過，足不出戶，只要80分鐘便可以和孩子環遊世界？說的其實是Starlit Learning Centre將於10月15及16日舉辦的開放日，這次主題是「80分鐘環遊世界」。在這裡，家長和小朋友可以一同感受5大洲遊學之旅。另外還有各具特色的教學工作坊，每個工作坊都能啟發小朋友各項潛能及發掘新知識的興趣，另有中心學生親自表演和抽獎活動，足以消磨一個下午。"


呢段，其實係呢次活動嘅簡介，見到好似好吸引咁，又咁啱逢星期六係媽媽同恐龍仔去玩嘅時間，於是，我地向銅鑼灣出發！

去到，啱啱係表演時間，好多人呀！我地企咗响lift口，唔知點算好，因為舞台就係柱後面，我地又行唔到入d去睇！呢隻恐龍仔就行咗上台，話佢又要表演喎！笑死人喇！
表演完，有一個小遊戲，就係小朋友傳波波，到音樂停咗攞住氣球個小朋友就可以上台玩，恐龍仔好想好想.. 可惜無佢份啦~ 下次再嚟囉！

第一站，我地去咗中國，認識面譜同埋玩咗個遊戲..


第二站，我地去咗埃及，認識當地名勝

第三站，係去咗歐洲，不過，我地無去扮公主，好快就出返嚟，玩咗一陣phonics棋，兩樣都係恐龍仔鍾意嘅嘢！

之後，差唔多夠鐘，Mandi姐姐走嚟問我地，仲想唔想砌igloo呀！當然想啦~ 恐龍仔見到d棉花糖就開心喇！哈哈~
最好，我地去埋澳洲整咗個回力標，呢個時候，竟然撞到朋友仔喎！傾咗兩句就差唔多就走喇！

呢日，都玩得幾開心呀！

而且，呢度真係好靚，設計好有心思，小朋友一見到就會覺得好玩！

如果Starlit開分店，會唔會開响沙田呢？

KTS面試

copy from EK~

用中文問的問題
妳叫咩名, 幾多歲?
平時爸爸媽媽在家同妳做甚麼?
有無兄弟姐妹?
用英文問(指住一幅畫)
What is she doing?
What time is it?
故事排列加畫結局再講番整個故事
串英文字
請串出草的英文字母
句子重組一中一英
小魚在水裹游
She is a nurse
數學題加認錢幣
一支雪條2元要用幾多錢才能買到4支雪條?
7-4=?

中文字佢只有句子重組
紙上有打亂咗嘅字老師
叫指出1 2 3 4.....
就係小魚在水裹游

http://forum.edu-kingdom.com/viewthread.php?tid=2336975&extra=page%3D2

歲半喇！

小牛歲半喇！有22磅~

呢排，佢開始識得指 eyes/nose/mouth, 開始想跟人講嘢！有時都會ma吓ba吓！
但其實，佢發展係有d慢！睇佢上playgroup就知！
佢行障礙物運送小動物時，總係跌跌碰碰，要扶實，唔係好識(想)聽指令，唔識分顏色(sorting)，唔多願意以正常方法玩玩具！
講嘢都有d慢~

但對於媽媽，因為不停叫自己唔好去比較，其實有d失去平衡：到底，阿牛係average, 定係below average呢？聽日去健康院喇！可能有答案~

但係，忙碌嘅爸爸開始有d不滿：媽媽無時間教牛牛！

呢個問題比較難解決，因為每次媽媽想同牛牛玩，哥哥總係會搞搞震！
唉~
每次媽媽喺屋企，呢兩隻嘢就會痴埋嚟~ 爭！
仲有，好多教具都仲係响箱，無攞出嚟~ 希望事事順利，快d搬好，有地方放哂我地d玩具啦！

可憐的ELMO

曾幾何時，牛牛好驚呢隻機械ELMO, 係又想搞，但係一見佢張大咀巴就驚驚~ 走人！
但係，自從佢無電，唔識郁，變咗隻手動公仔，牛牛就開始唔驚，仲會..

蝦ELMO!

蝦完ELMO就超興奮！
仲會餵McQueen俾ELMO食！

不過，ELMO都唔係咁好蝦架，會還口架！

(呢隻牛牛知道媽咪想影相，仲企定定俾ELMO咬佢！笑c人~~~)

balloon fight

今日媽媽放工返到屋企，見到兩隻嘢一人攞住一個長氣球，追打工人姨姨！
睇見佢地~玩得好開心！
然後，工人一句：牛牛is back to normal~
睇真d，又真係喎~

牛牛見哥哥做乜就跟住學

又精伶，又好玩，仲不停笑！

哥哥話：我有6隻腳！

所以，地上多咗兩大隻曱甴！

到媽媽同哥哥食飯，牛牛都食咗好多飯呀！落樓睇魚魚時，仲自己行，無扭抱添！

睇嚟，好可愛嘅牛牛返番嚟喇！

東涌機場大佛一日遊

重陽節，恐龍爸要開工，咁媽媽同恐龍仔有乜嘢搞呢？
恐龍仔話去睇大蚊喎~ (佢話，屋企天空飛過喎d係細蚊，要去機場先見到大蚊！)

去到，第一站係瞭望台，我地買定爆谷上去，諗住慢慢坐..
超風騷樣~



一坐，就坐咗個幾鐘，然後落去睇4D happy feet~



睇完，去食d嘢啦，都預咗大少食唔落架喇，不過係好少食到嘅fish burger同薯條，都唔錯！

下一站，係返東涌，諗住坐纜車上昂平，但一睇見條人龍：指示板話要等90分鐘呀！
恐龍仔好堅定咁話：等！

但係，真係好長龍，最終，我地改為巴士上，纜車落！

去到昂平，首先就醫醫肚：豆腐花+茶葉蛋，然後就行上大佛！



中間無停過，一口氣行上去架！

回程，路過市集，無去玩bubble, 無扭買嘢，無話攰！排咗超過半個鐘隊先上到纜車，無嘈過，無扭抱，完全係乖到極點！

纜車上，媽媽問仔：隔離嗰幾位，係咪日本人呀？
傻仔用心聽一下：係呀~佢地一定係坐飛機嚟架！
唔知係咪咁啱啦.. 隔離個HK哥哥同佢同行嗰兩個日本女仔，突然笑咗出嚟！

最後，我地响東涌等埋恐龍爸，一齊坐藍色的士去東涌炮台嘅印度餐廳食嘢！yummy~ 不過，當然就辛苦恐龍仔，除咗薄餅，無乜嘢啱佢食~

雖然話呢日恐龍仔出奇地合作，但係都有個少少插曲~
話說去到機場，瞭望台好似要11點先開，咁兩母子就周圍逛吓，入咗間精品手信鋪，恐龍仔摸吓d磁貼.. 唔覺意整跌咗一塊！本來，d女仔只係叫佢小心d，好易爛架！但係呢個阿媽好8掛，未想走，到行多幾分鐘，要走時，有個售貨員就攞住個磁貼話個角跌爛咗！(右上角)
 
咁~ 恐龍媽就叫呢位售貨員自己同呢位小朋友講！
恐龍仔初初好驚，唔知點算好，嗰件貨都唔平架，成$50！到媽媽話俾仔知：整爛咗就要買咗佢，售貨員B就走出嚟話：公司話爛咗~7折賣俾我地！
雖然，媽媽有d唔高興，但唔想嘈，就俾咗錢俾恐龍仔，自己解決~

仔呀~希望你知道，手仔唔可以亂咁摸貨架上嘅嘢喇！

大喊包牛牛

過咗一個星期，恐龍仔已經好番哂，但牛牛仲有d咳咳
呢日，一早我地又去晨運
牛牛出門口仲OK架

但一落樓就...

我地向前進發，牛牛就一邊行一邊喊，再唔係就熊抱媽咪腳！



唉，搞到大家心情都大受影響！

我地响公園揾到個雀巢呀！

恐龍仔仲做運動添

行咗一陣，牛牛不停咁喊，唯有返屋企，臨過馬路抱起佢：你睇佢個樣！偷笑呀！成隻樹熊咁，激c人！