自從食咗安胎藥之後, 就開始作嘔!
刷牙會作嘔~
飲清水都會~
最慘係肚餓~ 如果唔記得到時到候食嘢, 就會作嘔, 於是, 係食住嘢作嘔!
同事問: 你咁辛苦, 唔好食啦!
我答: 因為肚餓, 所以想嘔!
仲有, 就係好多嘢唔想食, 歺歺搵湯粉食!
12wk, 做OSCAR, 一切正常!
d書話, 過咗12wk, 就開始stable, 個心定咗d!
再見余医生時, 佢幫我抽血做antenatal check, 完全唔痛! 好叻呀!
好可惜, 個報告話血糖高咗dd呀~~~ 要做耐糖測試(即係飲糖水)~ 計吓計吓... 由有咗到呢刻抽咗好多次血喇!
初時hCG (x2); OSCAR (x1); 飲糖水 (x3) = 6針喇!
好在, 耐糖測試係正常嘅, 有驚無險!
大約到四個月左右, 就無咁想嘔喇!
之後, 照結構都一切正常順利!
2006/9/3 <日>
去厠所, 發展流啡~ 但係只係一点点
第一次, 無同老公講, 講唔出咩原因, 唔想佢擔心卦~
2006/9/4 <一>
晨早, 又有一点点啡, 個心開始有d不安~
返工, 打去診所約時間, 姑娘叫我6点上去等~
呢次見到吳崇傑医生, 佢俾我嘅印象好gentle, 佢開咗d安胎藥俾我, 係hormone嚟架!
2006/9/5 <二>
要過灣仔上堂, 由馬鞍山出灣仔, 唔知点解, 用咗兩個鐘!
本來有位坐都無乜問題嘅, 不過, 隔離坐咗個作嘔中嘅大肚婆~ 我呢個未見肚嘅未來大肚婆, 見到佢咁, 自己都覺得好悶~ 唔記得講, 我一路都無作嘔唔舒服架!
到落車~ 個人都散哂, 架老爺巴士又震得利害, 有d擔心~
好不容易捱到落堂, 自己在街上走~~ 第一次真係作嘔! 好想好想~ URRRR~
無嘢嘔出嚟!
跟據我嘅知識, 係我食緊嘅hormone (progesterone)發輝緊作用, this is a good thing~
呢兩日亦都無再流啡喇!
2006/8/3 <四>
Period遲咗3日, 一路強忍好奇心, 無攞收埋咗成年嘅pregnancy kit出嚟, 呢一日, 好想check吓~
個test kit 應該過哂期, 但係我有嘅係對呢d test kit嘅信心, 同埋~唔好唔記得, 我係化驗師嚟架! Test result? control 好深色, test 係好淺好淺嘅粉紅色!
俾老公睇, 佢當然唔識啦, 仲問我即係点?!
有人要做爸爸喇!
約10点, 下腹有d痛, 扯吓扯吓咁痛! 個心有啲唔安樂, 於是, 搵咗個唔駛referral嘅婦科医生, 下午去睇下~
呢位响信和嘅余医生都有五六十歲, 照咗好耐, 搵唔到胎囊, 只係話子宮壁增厚, 係成孕嘅現象~ 抽痛可能係子宮收縮, 唔好食苦瓜 (hmm, 當時我飲緊苦瓜汁) 一個星期後再照過啦~ 另外, 因為有輕微發炎, 種菌, 今次收medical card.
2006/8/6 <日>
Baby Expo, 要開工呀! 知道同事阿芳有咗3個月, 又見到好大個肚嘅堂嫂嫂, 仲有中學同學林及大肚太太~~ 急不及待咁話俾人知~~
呢一日, 我仲做埋bk member~
2006/8/8 <二>
搵咗一輪料, 打咗去仁安余医生度book first appointment, 要兩個星期係先有位呀!
2006/8/10 <四>
覆診~ 呢位余医生摷咗好耐, 都搵唔到胎囊, 見佢有d緊張, 就問:係唔係6wk一定會見到架? 佢答: 係!
於是, 佢再叫我留個小便俾佢~ 我用咗一d時間休息飲水, 個心好驚, 到佢叫我入返去, 俾我自己睇個result, 都係好淺色, 不過好過一個星期前~
佢同我講: 呢d叫chemical pregnancy, 有hCG 出, 但係無胚胎, 可能着唔到床, 要等佢自然排出, 或者係宮外孕, 所以照唔到~ 一個星期後再覆診睇下...
我因為有份maternity 保險, 要医生寫date of conception証明, 叫佢寫, 佢c都唔肯! 一路重覆我好唔想聽嘅說話!
最後, 佢放棄喇, 收我張medical card, 不過要我俾返個pregnancy kit嘅$$, $100...因為太唔開心, 無問佢攞收條~
走到街上.. 打俾老公, 眼淚不停咁流...
好在返到公司, 上司唔喺度, 我打咗俾老公個舊同學羅医生度, 佢叫我睇多個医生, 於是, 我打去翹楚改appointment, 姑娘話唔得呀! 我個心好亂, 甚至取消埋約十日後嘅期.. 好亂~ 打咗去馬鞍山仁安, 求姑娘俾我見医生, 終於, 我第二日見到鍾炎午医生~
2006/8/11 <五>
事隔約24個鐘, 我响仁安診所一照就第一時間見到胎囊! 跟據大小, 小B比預計嘅, 細咗有10日! 鍾医生解釋, 可能係排卵遲咗, 睇嚟一切正常, 如果我好想check清楚, 可以抽血驗前後48小時嘅hCG, 但係唔驗都得~
我想要個肯定d嘅答案, 所以, 明知我d血管唔係咁易抽血, 都驗!
2006/8/12 <六>
因為星期日馬鞍山診所唔開, 唯有遲一日, 即係星期六抽第一針, 星期一再抽!
2006/8/14 <一>
lunch hour 趕返馬鞍山抽血~
6pm 放工, 第一時間返診所睇報告, 今次見我嘅係霍穎儀医生, 好多謝佢俾咗個好消息我, 佢仲提我, 要小心血壓問題, 因為已經高咗d喇, 不過, 可能係因為緊張睇報告啦!
因為自己都係做化驗, 都明白個報告真係好快出, 好多謝仁安化驗室嘅MLT~
幾日之間, 心情由失去一切, 無哂希望, 到失再復得, 真係好開心~
之後
再約過余啓文医生, 見到佢, 佢俾咗個預產期我, 係四月十三日, 比我用LMP計嘅相差十日
2006/8/20 <日>
一早約好老公d同事遊船河, 非常順利, 後來先知, 其中一位媽媽都同我一樣, 預產期係13/4, 都係睇余啓文!
