~ 恐龍家 ~

2011年11月29日星期二

依依不捨

每朝都會同兩兄弟落樓玩吓，今日，玩完本來諗住叫工人姨姨陪牛牛玩多陣，爸爸媽媽同哥哥走先，點知，牛牛一路跟住我地，唔願byebye

一路跟到平台電梯大堂，仲想跟埋入lift!
睇住佢個眼神，好似好想跟埋嚟咁..

好可憐~
好唔捨得爸爸媽媽同哥哥！
(broken heart)

遲d就到牛牛返學架喇！唔駛扁咀~~ (kiss)

2011年11月28日星期一

project week

呢個星期係project week, 唔駛做功課！

問恐龍仔，今期主題係乜呀？
佢話：味道！有甜、酸、苦、辣、鹹。

小朋友要帶甜同酸味生果各一回校，問恐龍仔，其他小朋友帶咗乜呢？
佢答：都有人帶青蘋果，無人帶香蕉！

講咗一大輪，然後發現，蘋果同香港仲响書包！仲乜唔攞出嚟呢？！

突然，恐龍仔細細聲同媽媽講：我好唔開心呀.. 無功課做呀！

(winking)

2011年11月20日星期日

building blocks

牛牛好少玩玩具

佢多數搞吓呢樣，搞吓嗰樣

再爬上爬落！

但呢日，用咗超過十分鐘砌車仔！

2011年11月19日星期六

馬頭涌官立小學 (福馬)

早排收到通告，福馬邀請友好幼稚園嘅小朋友去參觀學校，不幸地，兩個細路都病咗，要留响屋企休息，恐龍媽同恐龍爸就如期到場見識見識~

開始，係有小朋友嘅表演，包括藝術體操，中國舞，管樂，同埋管絃樂團嘅演出。
然後，家長可以放低d小朋友，去聽副校長講解學校。

由地下太空禮堂行去6樓活動室，經過每層樓都有唔同嘅口號/標語，

最特別嘅係地下，有龍虎鎊！

响呢間學校讀書，競爭應該好大！

呢次係恐龍媽第一次聽官津小嘅briefing，好特別，副校只用咗4個字係講教學：「活動教學」，其他時間，就係講課外活動有幾精彩！
課外活動係自費嘅，價錢比出面學平，種類多，而小朋友有好多比賽機會，所有樂器都要入團，要個人學好之外，仲要同人合作。

作為官立學校，「一生一體藝」自然係最早做嘅學校之一，對外有多項比賽經常攞獎，而學校團隊亦攞過教育局俾嘅獎！聽起上嚟，老師真係好努力咁！兩副校亦多次強調，好多名校都鍾意响比賽場上揀卒，好多學生就係咁入到名中學！

副校用咗30分鐘去賣廣告，當然多次用一d大多數人唔係咁發音嘅字詞，e.g. 時間，有d真係從來無聽過日咁講嘅！
之後，恐龍媽問咗一位老師關於功課問題：學校唔著重抄寫功課，多唔多~好難講！一年兩次考試同測驗，測驗係唔計落總分嘅！(真係活動教學咁喎~)
由小三開始，會有潤澤課程俾能力上較好嘅學生，而小四開始會有兩班精英班。

就好似副校一再強調，呢間學校雖然已經50年喇，但一d都唔考，成日聽人講福馬校舍舊，但當日眼見，設計裝飾都幾有心思，無殘嘅感覺！

另外，副校亦多次重申，咁多年以來，自行收年階段係未收過15分嘅學生！如果福馬咁勁，咁紅馬都應該無望！(不過，2011年派位，九龍塘官小有人15分抽到！)

2011年11月18日星期五

對牛彈琴

哥哥做乜，牛牛都要學，咁哥哥彈琴，牛牛就當然要玩埋一份啦！
但係咁爬上去，好危險咁..
IMG_3225-8

牛牛一於好少理..

呢次係就係成功咗..

但係唔成功嗰d...會痛會流血架！
唉~媽媽睇見牛牛唔停咁爬，好頭痛！已經有兩次失敗紀錄喇！

2011年11月14日星期一

剪髮記

因為爸爸覺得短髮好牛精，所以恐龍仔d頭髮一路都剪得唔太短，係咁依修吓咁，好快又去剪過！自從7月中搬屋，短短4個月，呢次係第3次揾呢位姐姐剪頭髮喇！

每次，都唔係好定~
第一次，姐姐用說話氹掂佢
第二次，媽媽罰佢數1至200先可以定落嚟
呢次，佢周身郁，郁到打側身坐，然後向後坐，就係咁開始... 定咗落嚟！兩個"師傅"都話未見過咁樣剪髮！但你咪理~ 佢個頭就係無離開過張椅！
IMG_3072-8