青青世界

期待以久嘅出遊大日子！

我地今次約咗公公婆婆一齊去玩，近近地~ 深圳嘅青青世界！原本諗住坐火車去落馬洲轉的士，有網友話$6X就得，點知出發前嗰日，舅父話車我地呀 (應該係車公公婆婆先真！)，雖然假期第一日好多人過關，又多燈位，但係..兩個鐘都到達酒店喇！(唔該哂你呀~~ 舅舅！)

我地訂咗木屋，山腰啦~唔算好高！放低行李就去食飯~~好多人呀！！！

飯店外種咗好多瓜果~

食飽~ 我地就去公園出發！

第一站~ 係海盜船！呢隻船好斜，好高！恐龍仔好吃力咁爬上去，但係到落嚟時又驚驚！之後又要再上過去！但呢次唔敢落嚟... 唯有好似蟹咁.. 一步步行返落嚟囉！

之後~仲玩咗一大輪沙... 見到一個香港嚟嘅小朋友，恐龍仔跟住人玩...

然後，我地入咗蝴蝶園~ 裡面嘅蝴蝶品種唔多..

估唔到我部傻瓜機都影得幾清喎~

第三站~ 我地去咗玩"泥"！ 玩完之後就成身泥！

行返出嚟~見到好多嘢玩喎！
有大腳板、高橋、圈圈、仲有公雞車添！好在公公喺度咋，恐龍媽都唔知點玩...

之後，恐龍仔話要爬繩網！

媽媽唯有硬着頭皮~跟~啦！
恐龍仔行得好定，好輕鬆咁，一邊唱住歌一邊行架！佢阿媽就好無用，個心又驚，又要跟埋上去睇住個仔！
百忙之中, 影咗一張相！

呢一日~就差唔多喇！已經玩到好攰喇！
我地返房(507)沖完涼就去食自助餐，呢餐本來係訂咗牛扒餐嘅，check-in時，前堂個小姐話可以轉食自助餐，咁...咪自助囉！d嘢食都OK架！

未夠8點，我地就熄燈準備瞓覺覺喇！

早晨hotcake

一早，媽媽俾雀仔聲嘈醒咗，望一望鐘：未夠六點！當然係繼續瞓啦！

無幾耐，人仔打開房門走入嚟講早晨！仔呀仔~ 做乜六點就起身呀？！

到媽媽梳洗之後，就諗：不如去食早餐，出去行吓啦！

呢個時候，牛牛都醒埋喇！於是，我地一行四人(仲有工人姨姨) 就出咗去食麥叔叔hotcake喇！

估唔到，哥哥係大醋珵，佢不停咁引開媽媽嘅注意，唔俾媽媽同牛牛玩！見到牛牛有車車坐，佢就不停叫攰，行唔郁，要抱！！！

呢排成日都係咁！

牛牛呢？佢今日第一次叫哥哥呀！！！

媽媽就好開心喇~ 唔知做哥哥嗰個有乜感覺嘅呢？

要開始執屋喇！

BB大大吓，就自然有d嘢唔再啱用啦~

不如幫佢揾個新主人！

現有以下物件轉讓 ：

1. 黃色Bumbo Chair (舊) 連 tray (全新，無packing)  $280  ~hold~
   


2. Chicco Activity Playmat  $100    (SOLD)    
   


3. Hipp #3 奶粉 4盒 (1箱)
   
   OCT 2011 到期~ $400
   


4. Fisher Price踢踢摩天輪樂園　 
   
   (呢件比較舊，功能無問題架~  $50~ 平平平！唔想掉咗佢！不過要去烏溪沙自取！) (SOLD)


5. 幼兒讀、寫、與計算能力 by 七田真 $10, 新淨 (SOLD)
   


6. 如何讓你的寶寶更聰明 (How to Multiply Your Baby's Intelligence) by Glenn Doman, $20, 新淨






7. 
   
   
   

   Fisher-Price Miracles & Milestones 3-in-1 Gym Baby Toy  $50

   
   
   
   
   

基本上，馬鐵沿線交收，旺角/東九龍一帶，東鐵沿線可以weekend交收~

另~有3套baby gap 3-6mth男BB夏季套裝，好新淨好靚架！買開嘢滿$100又啱嘅，免費！單買書~ by post only，另付郵費！

有意請留私人回應

 

古怪牛

每個bb都好唔同，牛牛係一隻古怪bb，一隻口腔期超長嘅bb！

星期六上完PG，玩過入銀仔，於是，明知佢會放入口，都俾佢玩一陣啦！
佢就…以高速放入口！

仲要咬住唔放！

攞走佢，又再放過入口！

餅仔又唔見佢咁快手喎！暈低~~

牛呀牛，你好醜怪呀！

小實驗

唔好以為恐龍媽好勤力教仔，其實懶得不得了！好似呢排~ 印象中成個月無陪恐龍仔睇書喇！

今晚問佢：有咩書要媽咪陪你睇架？
佢話無喎~~
但係，媽咪隨手攞起本 "兒童好奇心大百科"...恐龍仔睇一睇目錄，佢話要"血為什麼是紅色的？"，呢樣，難唔到恐龍媽！

跟住，到"鹹水魚能在淡水中生存嗎？"
講完一大輪，唔覺得四歲人仔會明，於是諗起屋企有薯仔！
好啦~嚟做個小小實驗啦！

左邊係 淡水+薯仔
右邊係 鹽水+薯仔
下邊係 薯仔 (control)

要等30分鐘，有人唔捨得離開廚房，望住個鐘等...

幾經唇舌，我地出咗廳繼續其他內容，恐龍仔揀咗"為什麼會有影子"，於是，我地揾咗電筒，熄埋燈，試吓睇睇點解早晚個影會長d，中午會短d，仲玩埋影子遊戲...

期間，恐龍媽指住漏氣中嘅生日氣球話：你睇吓，多氣嗰個氣球同少氣嗰個有乜分別？多氣嗰個係唔係大d？硬d？ 而少氣嗰個就係細d~冧d？！

時間差唔多喇！

結果：長度無變，但係淡水嗰條薯仔明顯地硬d，而鹽水嗰條就軟d，仲係彎曲咗添！

總算有d交代啦！
傻恐龍玩完一輪，問媽媽可唔可以倒轉兩條薯仔！
好啦~ 我地聽朝再去睇吓佢地變成點啦！

第二朝..

浸响水嘅賬到彎咗，好硬！長咗0.3cm
浸响鹽水嘅就短咗0.5cm，好軟
放咗空氣之下，就會變黑，因為氧化咗呀！

工人回歸的大日子

今晚工人返嚟喇！

好想借個位讚吓屋企個男人：佢一個人頂咗5日！雖然第一日係咁打俾我問嘢，但係之後都上咗手，無乜問題喇！

嘻嘻~ 佢雖然係煩d，又小氣喎，唔讚吓會嬲架！不過~ 又真係掂嘛！咁當然要讚吓啦！

其實呢個星期，牛牛一路都有d傷風咳咳，我晚睇住佢，都無覺好瞓！但係~ 已經好咗好多！我自己都傷風咗個幾星期無好哂呀！

可憐！

工人返嚟之後，要去鬆吓喇！

已經定咗復活節帶恐龍仔去玩，工人同牛牛就留响屋企 (sorry呀牛~ 你一日瞓到黑，我帶你去都無得玩架啦！) 期待ing~~

人地老豆，得閒不如set過條ticker啦！

 

工人準時9點返到！恐龍仔啱啱上床瞓！隻8掛豬聽到聲，即刻抱住佢張貓貓被上嚟！然後揾auntie同佢pray！

恐龍仔最近話，auntie教佢pray~ 我第一日教佢pray for the children in Japan. 第二日，因為啱啱講完個愛護地球先生嘅故事，就同佢一齊話要愛護地球先生啦！佢話God唔識聽中文架！

哈哈~ 留返auntie同你pray啦！

 

牛牛的生日

一早，爸爸帶咗哥哥出去上音樂堂，剩低牛牛同媽咪，媽咪突然諗起要影吓相喎，於是入房攞相機啦..

有d人仔好快手，搶咗個鏡頭蓋玩！

仲玩得好開心添！

下晏~ 瞓醒無嘢做~ 媽咪同牛牛玩新招！

貪玩嘅牛牛係笑哂架！一d都唔驚！

夜晚，爺爺嫲嫲嚟咗我地屋企，我地叫咗KFC同pizza，好少見哥哥食到咁！左手一啖~ 右手一啖！哈哈！

重要時刻！牛牛對燭光好感興趣！所以要捉實手仔！佢見到個蛋糕好開心！

到爸爸抱住佢，仲興奮到大笑！好難得影到笑成咁嘅BB！

扭計牛要落地玩，又唔少得呢隻哥哥啦！

都唔知幾時先影到張正經d嘅合照！唉~

哥哥話要表演俾爺爺嫲嫲睇喎~

又點少得呢隻牛牛呢？！

傻牛牛一食啖蛋糕唔夠兩秒 (都未吞！)就嘔喇！所以要同佢換過d衫！

牛牛個樣越嚟越似哥哥同期個樣！得閒媽咪又要幫牛牛執相，整佢頭12個月嘅相架喇！