學識踩單車喇！

經過呢兩三個月嘅努力，恐龍仔鍾意成功踩到單車喇！有十幾秒呀！！！

係無用輔助轆踩架！

多得恐龍爸，佢得閒d就會帶恐龍仔去海濱長廊踩單車，雖然恐龍爸好忙，但係呢次終於踩到，真係值得高興！

哥哥叻叻！

爸爸叻叻！

 

自己瞓覺豬

自從工人放假，恐龍仔夜晚就開始自己瞓覺！唔係爸媽想特訓佢，而係~ 牛牛8點瞓，佢等唔到媽媽出嚟，佢話好攰... 就自己去咗瞓覺！

到爸爸得閒幫手嘅日子，問佢要唔要人陪~ 佢就話唔駛喇！

咁當然，唔係非常順利嘅，恐龍仔就試過兩晚走出廳或者响房開著燈唔知搞乜！

佢話：d LEGO未執呀！所以我出嚟執返佢囉！

好啦~ 執好就要返去瞓喇！

 

識聽指令

呢兩日同牛牛沖涼，都同佢講：好喇~ 要起身喇！

佢跟住起身！第一次無在意，但到第二次… 感覺神奇！

今晚，牛牛未瞓之前，我入咗房，佢响廳，我由房叫向走廊另一邊嘅牛牛：爬過嚟媽咪度呀！

佢望住媽媽笑一笑，然後起步爬過嚟！邊爬邊笑！

爸爸即時攞起相機，拍咗video！

牛牛真係爬哂成條走廊 (6米左右啦~) 去到媽媽腳邊！！！

笑住望住媽咪！

sweet baby~~  開始有智慧喇！

小小生日會 2011

恐龍仔嘅小小生日會，佢點名邀請咗3位同學仔，加埋霖霖同埋另外一位朋友仔軒軒，總共請咗5位小朋友，可惜，我地一路聯絡唔到棉棉同學嘅家長，所以，只得4個小小貴賓。

爸媽一早準備咗氣球，係呀~ 其實呢個都係牛牛嘅生日會！

多謝霖霖媽媽，帶咗波波俾牛牛玩，仲有工人姐姐嚟幫吓手！

大家都好遲先到，搞到5點先切蛋糕，小朋友們坐定定食，佢地個個爭住食蛋糕上面嗰D糖公仔！

原來~ 所有賓客都未見過骨頭腸！恐龍媽準備咗十條，轉眼就無哂！

恐龍仔點名要媽媽整嘅香草焗雞亦！大家可以放心食呀~ 我地用嘅係無激素嘅雞亦呀！

另一恐龍主意：蝦片！

食得差唔多，小朋友就同牛牛爭玩波波池！BB池有危險呀！

玩玩吓，恐龍仔同女朋友仔穎穎一人攞住個氣球通屋跑！你睇佢幾開心呀！

玩到爬上床！

呢個時候，Party已經去到尾聲喇！大家食埋d水果就開始走喇！
Hmm... 恐龍媽唔記得咗攞d鮮奶布丁出嚟呀！！！！

3個小朋友走咗之後，淨返牛牛~

咁都玩得一大餐！

再一次多謝同學仔軒軒，恐龍仔好鍾意你份大禮物呀！仲有無爸爸接送，坐公車都嚟嘅穎穎，恐龍仔見到你就最開心！仲有霖霖，雖然你經常打小報告，但係都多謝你借出嘅波波同埋工人姐姐！仲有仲有~ 另一位軒軒小朋友嘅禮物，叔叔同姐姐嘅幫忙，無咗你兩個，恐龍媽就要自己做多好多嘢喇！！！

牛牛@動身又動腦

今日係牛牛正式上playgroup嘅大日子，但係因為工人姨姨放緊假，要帶埋哥哥一齊出街，時間較難控制，我地遲咗少少...

牛牛上堂時都幾定架，無乜點走嚟走去 (爬嚟爬去~) 但係小肌嘅玩具仔~佢就未玩到住！傳玩具時更加喊得好慘！鬼咩~ Sam Sir 俾牛牛做第一個，7-8個小朋友，咁佢傳6-7次，喊死囉！

牛牛最叻叻就係玩swing！見到其他小朋友多數都有d驚驚，有d甚至大喊阿媽，但係牛牛就... 好似好enjoy咁，一路笑咪咪！本來拍咗片架，但係我地專重導師，唔放片上blog，但係相呢？好郁好矇呀！

牛呀牛~ 你真係同哥哥好唔同！好大膽呀！

Studio 相 2011

一直想帶牛牛影相~ 一拖再拖，終於成事喇！我地揀咗哥哥生日嘅日子，買咗生日氣球 (可惜出鏡率不高)，牛牛都幾乖，但哥哥就…

四歲喇！！！

今日係恐龍仔嘅四歲生日！

落到樓下，不停同d看更講：我四歲喇！


為咗準備佢個小小生日會，媽媽尋日再出sms提兩位同學仔媽媽，其中一位打電話嚟，叫恐龍仔聽，恐龍仔好正經咁同小女友講:

~ 係呀！食咗喇！
~ 做咗喇！七點幾就做好咗喇！ (當時咪七點幾囉！亂咁講！)你呢？
~ 好多謝你呀！多謝你嚟陪我呀！

媽媽諗：教佢咁多樣嘢，最開心係佢學識話俾你知人地做咗乜嘢佢係會開心嘅！無諗過佢識得同小朋友仔講多謝！係多謝對方會嚟佢個生日會！

仔呀~ 希望你身體健康，唔同成晚踢被，你一咳我就唔駛瞓架喇！