~ 恐龍家 ~

2011年2月22日星期二

食餅餅

牛牛呢幾日開始識食餅仔喇!!!

d大人就好衰嘅.. 鍾意引人!

要人山長水遠.. 由網床嘅一邊行去.. 另一邊!

終於~ 食到喇!

仲想食喎~~ 古古惑惑咁!

話佢聽無喇~ 就作哂狀! 扭計仔!

無餅食~ 荔枝波都殺!!!

牛牛有樣叻, 就係哥哥極怕嘅海膽波, 對佢毫無難度! 仲好熱情地去探索 (口腔期嘅BB~ 係由口去探索嘅~~~)

仲乜一朝早就放蚊呀?!

2011年2月21日星期一

大進步!

呢個星期恐龍爸放假溫書，但不忘陪仔，尋日黃昏時間就同恐龍仔踩單車喇！

恐龍爸會報: 恐龍仔自己可以踩到六七秒喇！係有人八卦周圍望，搞到失平衡，又要再嚟過囉！

傻仔呀~ 當然你個樣一定好"認真"、好吸引！

辛苦哂恐龍爸呀！

2011年2月20日星期日

鎚仔與玻璃窗

同恐龍仔坐巴士外出, 佢突然話要揾鎚仔敲碎玻璃窗！

非常媽媽於是話: 你知唔知邊度會有鎚仔呀?

人仔當然唔知啦.. 答案係: 太平門旁、巴士上層、部份火車/地鐵列車

要打邊度?

恐龍仔話旁邊..

媽媽就教: 要打中間架! 打中間唔駛咁大力都打得碎!

點解? 呢個係槓桿原理... 不如下次我地買d 餅乾條試吓點解中間易碎d..

幾時先要打碎塊玻璃窗呀?

要有危險時, 需要逃亡時~

濕疹牛

牛牛d濕疹~ 時好時壞!

睇見佢塊面咁.. 好心痛!

所以，計劃緊幫佢轉豆奶.. 希望有d幫助啦!

牛牛依家叻咗架.. 識得除帽、除earmuff！

單手攞奶樽都得！

其實，係咪大部份bb都為食架？哥哥長期厭奶，所以媽媽真係未見過哥哥見到有嘢食會行埋嚟，無見過佢為咗食嘢而扭計仔..

一日之後.. 塊面又好咗好多！都未同你轉豆奶！到底~ 點解牛牛d濕疹時好時壞嘅呢？

個身都好咗，雖然仲係好紅，但係開始乾喇..

睇見牛牛咁，真係唔敢亂俾嘢佢食，見佢有時R到耳仔出血，好恐怖架！

2011年2月19日星期六

家長日 2011

又到家長日..

諗咗好耐, 到底帶唔帶埋恐龍仔去呢?

終於, 唔忍心留低佢响屋企, 於是就俾佢跟埋嚟!

去到, 睇吓今次嘅試卷.. 幾好，唔會亂做！唯一扣分嘅係唱歌唔識做動作！

之後見老師，一開始就講到媽媽好想講嘅問題..

老師話: 恐龍仔開學初時唔守規矩, 唔肯坐定定, 食嘢又慢! 老師出盡百寶, 人仔一月時已經有明顯進步!

食嘢嗰度, 其實恐龍媽上次同過老師講, 想佢幫幫手等恐龍仔食哂d嘢，原來老師都用咗唔少"火", 試過同佢講: 如果食唔哂就無得玩分組活動, 無得上校車!!! 曳人終於响上校車前完成任務 (好險!) 從此~ 食嘢唔駛老師提，而食得最快嘅係乳酪! 可惜學校唔鍾意小朋友帶乳酪, 所以.. 嗰次個個別情況。

(唉~ 唔怪之得恐龍仔成日話唔鍾意返學，因為佢食嘢食得慢，老師鬧啦!)

都幾明白點解呢個小朋友咁唔鍾意返學，可惜~現實係咁! 返學就有返學嘅規矩要守，唔係返去玩吓咁簡單！

老師仲話：呢個仔學嘢好快，讀書嗰方面唔駛擔心，係要留意吓佢d功課同埋手冊，佢會自亂畫！ (呢層媽媽都好清楚！有時係有意唔幫佢擦乾淨，等老師見到架！)

仔呀~ 就算幾自由嘅地方，都有紀律要守，否則世界大亂！

學校影咗d上堂嘅相, 呢隻仔又係無張正經嘅.. 暈低!