首先，恐龍家未有咁幸福，暫時仲未駛選擇住，但討論區不難發現A校vs B校 vs C/D/E 校嘅post，有人乜都唔講，只話A好！然後大家紛紛發表選擇，但發問者要d乜？真係想有人幫手投票嗎？可能啦~ 但有次，有位樓主話：正反意見都想聽！
如果，你孩子有選擇上嘅問題，作為家長，你會點幫佢？幫佢做決定？還是幫佢分釋問題，各項選擇嘅優點決點？後果？然後俾佢自己做決定？
但係觀眾們就只容許正面訊息，不容任何負面嘢，但無聊人如恐龍媽，只對某兩間學校有過負面記憶，兩次都俾人插！
唔係第一身嘅，預咗俾人插，但第一身經歷都插，真係無嘢好講！只能講一句：EK文化！
凡事都唔係完美嘅，學校亦然，孩子各有優點，學校特質未必適合所有小朋友~ 目標係搵一間適合孩子嘅學校！
講出嚟就人人都話啱，但係到一出名校大名，竟然大部份人唔記得咗自己要乜，或者，應該講，個個要名校！
其實名校唔係得個名架咋！點解唔可以了解多d呢？
但名校俾嘅，未必樣樣合你”當初” 心意？係咪一律睇唔到？！
我自知討人厭，總係唔識講嘢，太過坦白，但我無抹黑任何學校嘅意思，講親身經歷，對我重要嘅嘢~ 未必對你重要，睇咗咪算囉，何必動怒？！好似活動教學同課堂紀律，呢樣嘢好難控制，好睇老師功力，但一般活動教學就係無咁嚴，我接受唔到學生响老師講緊嘢時加把咀，可能你會覺得咁先係正常討論情況，黑定白~好個人嘅感覺，可惜~ EK人就只接受人家讚美，不容許其他人講話唔鍾意！
好喜歡一位家長嘅填鴨與野鴨論！填鴨、野鴨，各有可取之處！有部份喜歡野鴨學校嘅fans，係唔鍾意人地標籤學校係野鴨，咁都算負面！但係，間學校文化就係咁！俾佢入到去，就屋企填鴨，學校野鴨！咁又為乜呢？！
發完牢騷~ 多謝收看！
這個星期係兩間大校嘅面試週，眼見forum好多家長話撞期，但係我地响無特別考慮安排之下，一間係第一批，一間係最後一日am。
最近忙哥哥小一面試，並無特別教牛牛d乜，考天才波嘅結果係，估都估唔到，牛牛粒聲唔出！其他嘅指令就叫住算做到啦。一出學校大門，又變成一隻開籠雀！
賽後檢討：
- 佢識背1-20，但佢唔識數數量！
- 一向見陌生人都唔太願說話，就算响學校都係唔多出聲嘅，無奈爸媽實在太忙，無諗過面試時情況！
- 8:30am，實在太早！牛牛熱身不足！
補救..
距離第二間面試仲有3日，爸爸找上同事嘅女友(幼兒教育工作者) 上我地屋企度同牛牛特訓一小時！發現…
- 牛牛中文詞彙不足，好多大路嘢，如動物名，佢只識英文！
- 原來一d好基本嘅對答，我地都無做過，如~ 小朋友，你住响邊？
之後，又搵咗位做過playgroup導師嘅朋友同牛牛玩，呢次好d，佢熱身一陣就肯開口答人喇！
星期日，爸爸早個幾鐘帶咗牛牛出去公園熱身，玩吓，準時到，但因為大家都預早到達，所以準時嘅係最遲，由到達到面見完不足20分鐘！呢次面見內容比先前簡單，牛牛有問有答，唱歌時起初細聲，當爸爸叫佢大聲d，佢都做到！
雖然，講到底我地係想留返响原校，但無奈要11月尾先知結果，希望到時有好消息啦！如果唔係… 12月仲有兩單！
最重要嘅係，我地經過呢次之後，知道實在放得太少時間响牛牛身上，以後要加把勁喇！牛牛其實都係一個愛學習愛睇書嘅小可愛！
