~ 恐龍家 ~

2009年6月9日星期二

恐龍party!

wahahahaha~ 好開心嘅一個晚上!

呢排揾返唔同size嘅恐龍出嚟, 嗰日去東坪洲嗰隻係中碼, 平時陪瞓嗰隻係大碼... 今晚揾哂四隻出嚟認大中細~

估唔到~ 恐龍仔玩得好開心, 仲玩排隊隊添!

仲有唔同花式...

總之就笑死人啦!

絕對係經恐龍仔手嘅傑作!

一邊玩~ 我地一邊聽mother goose歌仔~

恐龍仔不時會跳起舞嚟.. 就係賞心悅目!

2009年6月8日星期一

選校攻略? ------ 邊間好呀?

成日見到有家長响討論區問: 邊間幼兒/幼稚園好呀? 最搞笑嘅~ 見過有個家長好堅持咁問: 邊間學校出名? (!!!!! 出名衰嘅~唔知啱唔啱呢?)

有無發現, 呢d post會有兩個下場: 一, 無人回覆; 二, 好心又得閒嘅人(如恐龍媽)就會問樓主: 你想要d乜先? 我心目中嘅好~ 可能同你嘅好唔同!

家長~ 你應該問自己: 邊間學校適合小朋友呢?

任何人嘅意見, 坦白講, 都唔可能apply to all~ 只有家長最了解你小朋友嘅強/弱點, 最最緊要嘅係: 你想點教!!! 揀一間教學理念一致嘅學校好緊要!

所以~ 首先, 唔該兩公婆傾吓將來會想小朋友行咩路, 讀邊類型嘅中小學, 唔係誇張~ 唔係講笑架! 當然嗰條路可能過咗一排會變, 有新嘅安排, 好似我地咁~ 舊年12月都仲堅持留响屋企附近讀N1, 一月就交咗另一份報名表! 入咗~

呢個係恐龍家嘅思考模式:

國際學校? no way, 每次見到d老豆老母講廣東話, 但係d細路答英文~ 就頭都大埋! so~ 國際課程(IB)? no way喇!

活動教學? 好似好理想咁~ 不過, 聽d小學老師同埋一位小朋友啱啱升小一嘅家長講... 我諗, 都係試咗坐定定先, 唔得先"活動"啦! 如果"活動"開, 坐唔到架喇! 開心3年換嚟漫長嘅痛苦~ 咁就唔好啦! 除非你立定主意要一路"活動"到中學畢業啦! 我地唔想冒呢個險~ 因為未有行呢條路嘅小朋友見到.. 保守d好!

全日班好辛苦? 如果家長都覺得讀書辛苦, 小朋友又點會鍾意返學呢? (正如, 如果家長唔鍾意睇書, 就唔好話個細路唔鍾意囉!) 個人認為: 如果安排照顧上有困難, 就應該返全日班, 唔好以為好辛苦, 其實全日班教嘅嘢同半日班有d分別, 佢地會注重自理能力多d, 會多d時間玩同瞓同食, 所以一d都唔會辛苦!

課程深d好? 呢樣要因應家長要求同埋小朋友能力喇! 肯定深d就唔怕升小一時適應上有問題, 但係小朋友都好adaptive架~ 而且, 0-6歲嘅小朋友好似海棉一樣咁吸收知識, 多d input, 咪等佢自己吸囉! 吸都幾多就幾多啦~ (呢個係hkps嘅approach)

NET? (native english teacher) 市面上~ 好容易搵到d又好又平嘅英語教材, 但係中文呢? 唔係簡體字就係有埋台灣拼音! 而且中文其實難學過英文架! 基於恐龍仔接觸英文嘅機會較多, 我地無專登搵有NET係班主任嘅學校~ 注意: 0-6歲(有d又話0-3)係學習語言嘅敏感期, 想學好就一定要响KG學, 所以近年兩文三語嘅學校好搶手! 有人會擔心小朋友會混亂~ 所以就要搵NET教, 小朋友會學識見人講人話, 見鬼講鬼話喇!

小學呢? 所謂傳統名校, 其實唔一定係傳統教學架喇! 而且, 呢d名校其實係家長"幫助"下繼續培育出一班優秀嘅學生~ 其實恐龍媽唔buy呢套, 不過基於名牌效應, 都可以一試嘅~ 肯定嘅係, 直資名校家長會有錢d囉~ 質素就唔敢講, 有d人有錢但係好無品架! 郁d就出律師信!!!!

ok~ 我地target咗一d九龍塘區嘅所謂名校(for K1), 羊群心態, 多人爭就爭埋一份! 好唔好? sorry, 其實無得比較! 除非有人將對twins放响唔同學校啦..

恐龍媽同朋友媽媽講過一個笑話: 大家唔好成日以為响九龍塘嘅就係名校先得架! 如果康傑都响度開返間, 即刻變名校呀! (唔係想話康傑唔好! 呢間係本來唯一一間我地報咗嘅幼兒園呀! 我地幾鍾意架! 只不過, 對其他人嚟講, 佢可能普通d~ 就好似我地唔會諗迦南一樣.. )

跟住~ 就係睇多d學校同埋有關資料喇!

幼稚園概覽 (有學生人數/全日半日班/有無N1兩歲班/教學理念/學費什費/學卷/網頁等等嘅資料, 好有用架!)

當然~ 要上BK睇吓其他媽媽嘅post, 睇多d, 了解咗, 如果仲有問題嘅先問都未遲!

另外~ 成日見到人問: 有無報名日期/open day嘅list呀?

好心啦~唔該! 有無諗過呢d名單响邊度嚟架? 一早就問, 連個別學校都未知自己幾時接受報名呀! 呢個世界無不勞而獲架! 自己問心儀嘅學校啦! 你鍾意嘅~ 大家好歡迎你share囉!

仲想提多個point~ 就係你會發覺有d學校好多人話好, 客觀而言, 家長話學校好係好正常嘅一件事, 特別係嗰d名校, 佢一年收幾百人呀!!!! 相比有d一年收得一百個嘅, 好評相對一定爭d, 所以唔係有幾多個人讚好就即係真係好! (similar, 唔係某小學收某KG嘅畢業生多就即係佢地buy呢間KG多d, 要睇埋比率先知, 可惜唔係咁易俾大家搵到呢d料.. 不過CCKG嘅學生又真係幾受DBS/DGS歡迎嘅~)

不過~ FYI

HKPS 會每年11月第一個星期六上午發放報名表 (N1 同 K1 一樣), 九龍塘唔接受重覆編號嘅報名表, 火炭嗰間就無問題~ 另外, 可以預約响當日參觀校舍, 順便攞埋form~

KM 嘅N1 就每年一月內接受報名, 張form响網站自己download就得 (K1嘅安排好似唔同)

好多N1係隨時都接受報名架.. 不過可能會有一個日子前, 佢地會成批一齊安排interview咁囉~ 好似合一堂同康傑都會係咁~ 不過聽講合一堂都幾搶手架, 所以遲咗就未必有位, 但係基本上, 康傑可以隨時插班~

KV無website, 每年十月中左右派表~ 詳情可以寄信或者打去問

St. Cat - Those wishing to apply for K1, please call
2337 7344 after September 11, 2009.

歡迎大家一齊交留吓~ 恐龍家都想收多d料!

2009年6月7日星期日

燒燶豬 @ 東坪洲

恐龍家其實有d自閉傾向~ 朋友仔約去海邊玩唔去(恐龍爸話南區遠喎) 但係東坪洲就近!!!!

恐龍仔醒咗見到媽媽~ 第一句係: 去街街!

好啦~ 就去達好遠好遠嘅地方!

晨早八點向大學站出發, 買完包包就上的士去碼頭(留返d 精力呀~)

(抱實恐龍仔~ 四圍睇嘢)

上到船已經好滿.. 好辛苦先揾到兩個位! 仲好好彩係窗口位~~~

個半鐘旅程, 恐龍仔好乖好開心, 唔停咁笑, 周圍d人都有撩佢玩, 我地拒絕咗一粒萬樂珠~

仲有人企埋窗邊同恐龍仔合照!!! (恐龍媽等人影完先知!)

終於到喇! 雖然我地有帶車仔, 但係車仔唔係俾小朋友坐架! 恐龍仔好乖~幫手推車!

沿途~ 恐龍爸都會停低影吓相~ 恐龍仔就自己搵嘢玩.. 例如~ 搬石頭! 執貝殼!

呢度真係好靚呀~ 可惜人仔唔係幾肯望鏡頭!

我地向鐘樓石方向行~ 恐龍仔好鍾意行石頭~ 一路行, 一路話: 大步"籃"~

但係路途遙遠, 要攞埋車仔真係好吃力! 所以行咗一半就停停食d嘢, 然後落水玩咗一陣!

之後~ 返去屋仔嗰邊坐吓~ 食d嘢~ 恐龍仔唔肯食包包, 媽媽俾咗d蛋佢食, 仲有豆奶一大包!

佢好多表情~ 今日真係好乖好可愛.. 搞到咁~又影一大餐!

恐龍仔認得豆奶個"豆"字! 其實我地都唔知佢識幾多中文架~

之後~ 上咗車仔瞓.. 推咗10分鐘左右就瞓着喇~

我地响涼亭休息咗一陣, 見到多人就轉咗去碼頭.. 恐龍仔瞓咗一個鐘就醒咗喇! 然後~ 又自由行! 睇佢幾開心!!!

之後上船~ 好大浪呀! 恐龍仔有d唔舒服咁, 發脾氣仔!

有哥哥請食朱古力豆~ 跟住又有姨姨請食紫菜 (點解今日咁多人請食嘢嘅?!) 全部一一拒絕! 好在恐龍仔唔唯食架啫~

後尾~ 爸爸抱住瞓着咗~ 然後恐龍媽接手.. 恐龍仔又瞓咗差唔多一個鐘..

食埋飯返到屋企都8:40pm 喇!

總結:

恐龍仔好鍾意探索~ 平衡力唔錯, 行石塊無問題!

雖然有著片, 但係基本上條片係乾嘅~ 好叻仔呀!

下次恐龍媽要帶多d水~ 唔夠飲! 乾糧都要帶多種!

佢全日心情都好好 (除咗回程暈船浪之外) 算聽話!

曬燶? 嗰個其實係恐龍媽!

2009年6月6日星期六

Show Time~

恐龍媽第一次"教"恐龍仔對住樂譜彈琴..

其實~ 只係睇住d 數字彈~ 預先已經問准恐龍爸.. 响琴鍵上面寫咗1/2/3 (唔係隻隻歌都係1 至7架! 都揾咗一輪!)

首先~ 表演前.. 望吓鏡頭先啦! (恐龍仔笑緊架喇 ) 再來個豬咀呀! (好合作喎!)

跟手試一試琴, 媽媽好似教用手指仔按琴鍵架喎~~

係喇~睇睇琴譜先! (好迷惘~)

支stick好玩d喎!

(有無發視咀角有個酒凹呢?)

無乜興趣喇~

不如~ 繼續玩腳仔同食腳趾啦!

(失禮哂!)

恐龍仔著住呢隻背心.. 响街俾人叫妹妹! 恐龍媽仲估個頭剪得好型仔添!

今日d相.. 唔知恐龍爸之前set咗d乜.. d色古古怪怪! 恐龍媽要較白平衡! 因為生手, d色張張唔同..偏藍! (屋企個mon都唔係幾得~)

--------

個幾月無返playgroup喇! 今日終於上堂~ 恐龍仔坐唔定~ 因為好奇心好强, 唔停咁搞Sam Sir d 導具!!!!

俾Sam Sir 送咗個"1"俾佢 (類似黃牌啦~)

想講嘅唔係上堂嘅情況, 而係由瞓醒去厠所到上完堂返屋企, 差唔多兩個鐘, 見到佢RR吓, 趕返屋企去厠所.. 又無出事喎! 雖然都仲未肯講要去厠所, 不過RR吓呢樣嘢.. 好似個個仔都係咁架喎! 第時又要教佢唔好咁醜怪呀!

相信~ 成功在望喇!

2009年6月3日星期三

拼圖遊戲

一歲左右~ 已經開始俾恐龍仔玩砌圖 (有粒的嗰d), 訓練前3指同埋圖形/空間感~

其實歲半開始已經可以玩類似大人玩嘅拼圖, 可以由4塊開始.. 恐龍仔一路都有一副4塊嘅, 係奶粉廠嘅贈品~

今次去台北, 恐龍媽揀咗兩套拼圖: (一路俾恐龍爸哦~~~仲乜買咁多!!!)

一套係一盒八大塊, 分唔同主題, 我地揀咗海洋生動~ 咁~就係魚呀~ 蟹呀~ 龜呀咁囉! 呢套會跟住唔同部位切割, 所以會有一小塊頭仔, 一小塊腳仔咁囉~

(估唔到~ 呢套對恐龍仔太易喇! 一分鐘唔駛就搞掂一隻小動物! 好快玩駛~)

另一套有四大塊, 又係分唔同主題~ 我地買咗可愛動物~ 獅子嗰d~ 每件有4-8小塊, 底部係相同嘅黑線白底圖案..

第二套就似大人玩嘅拼圖, 每塊大小相約, 唔係跟圖形切割, 可以訓練小朋友嘅想像力, association, 觀察能力~ 估唔到.. 仲可以玩填顏色!!! (恐龍媽成日都話: 呢個仔其實係工人姨姨教架! 真係諗唔到可以咁玩! 佢教恐龍仔填返一樣嘅顏色响背後!)